Главниот економист на ЕЦБ: Каматите ќе ги зголемуваме и следната година

Европската централна банка (ЕЦБ) најверојатно ќе продолжи да ги зголемува трошоците за задолжување и следната година за да обезбеди враќање на инфлацијата на целта од два отсто, изјави нејзиниот главен економист, Филип Лејн за „Маркет њуз“ (Market News).

„Мислам дека во декември нема да биде последното зголемување на каматните стапки“, рече Лејн во интервјуто објавено на веб-страницата на ЕЦБ. Запрашан за веројатноста банката да паузира со зголемувањето на каматните стапки додека почнува да го одмотува билансот на состојба, Лејн рече дека сега е „прерано за да се има цврсти ставови“.

Тој кажа дека „порелевантен аргумент од паузирање е да се премине на помали чекори, но во соодветно време“. Додаде дека во следните одлуки ЕЦБ ќе мора да го земе предвид фактот дека претходните потези продираат во економијата со задоцнување.

Тековно недостасува моментум за трето последователно зголемување од 75 базични точки на состанокот на ЕЦБ на 15 декември, велат познавачите на состојбите. ЕЦБ ја зголеми депозитната стапка за вкупно 200 базични поени од јули, додека еврозоната веројатно е во рецесија, со инфлација блиску до нејзиниот врв.

Лејн, кој рече дека секоја рецесија ќе биде „блага и краткотрајна“, ги предупреди двете страни во преговорите за платите да внимаваат да не започнат спирала меѓу платите и цените.

„Компаниите и работниците треба целосно да разберат дека инфлацијата ќе се сведе на нашата цел од два проценти во текот на овие години“, нагласи тој.

Во моментов нема коментари за веста. Биди прв да коментира...

Остави коментар