.webp){kind=icon}
Германија сака да направи паметните броила да бидат задолжителни за големите и средните претпријатија за да можат операторите на мрежите подобро да следат како се користи енергијата и кога треба да се зголеми испораката на електрична енергија од обновливи извори.
Предлогот на Министерството за економија има цел да го олесни и поставувањето на тие дигитални броила во домаќинствата, се наведува во документот во кој „Блумберг“ имаше увид.
Владата на канцеларот Олаф Шолц сака овој предлог парламентот да го одобри уште во првото тримесечје од следната година. Германија ја има најголемата економија во Европа и е дом на корпоративни гиганти како што се „Фолксваген“ (Volkswagen AG), Дојче банк (Deutsche Bank AG) и „Адидас“ (Adidas AG).
Земјата, која западна во енергетска криза поради зависноста од рускиот гас, се обидува да премине на чиста енергија за да се одвои од фосилните горива и да ги исполни амбициозните климатски цели. Владата сака да зазелени 80 проценти од својата потрошувачка на енергија до 2030 година, во споредба со 41 отсто, колку што беше лани.
Сепак, инсталацијата на овие уреди би била бавна поради загриженоста околу заштитата на податоците и сајбер-безбедноста. За да се забрза префрлувањето, Владата сега дозволува вградување сертифицирани броила кај малите потрошувачи, дури и ако не се активирани сите нивни функции. До 2025 година тие ќе бидат задолжителни за потрошувачите од 100.000 киловат-часа годишно, како и за производителите од 100 киловат-часа.
