.webp){kind=icon}
Германската економија се намалила за 0,2 отсто на крајот од минатата година - што е исход полош од претходно означениот и што ја прави рецесијата поверојатна поради зголемените сметки за енергија.
Податоците што ги изнесе заводот за статистика во понеделникот се во спротивност со процената дека производството ќе стагнира во четвртиот квартал. Тие, исто така, значат дека намалување во периодот до март сепак би предизвикало рецесија во најголемата економија во еврозоната.
Германската економија забележa неочекувана контракција / Bloomberg
Неколку индикатори во последниве недели укажаа на зголемена доверба во Германија по благата зима и добро пополнетите складишта за природен гас што го елиминираа ризикот од недостиг за време на периодот на греење. Цените на големо за оваа суровина паднаа од рекордно високо ниво, поттикнувајќи надежи дека инфлацијата ќе се олади порано отколку што се мислеше.
Побарувачката е намалена бидејќи зголемените цени продолжуваат да пробиваат до потрошувачите. Тој тренд е видлив и во Шведска, чија економија неочекувано забележа пад во четвртиот квартал, покажуваа посебни податоци во понеделникот.
Производителите, кои играат огромна улога за Германија, бележат пад на нарачките, иако производството е поддржано од големиот заостаток и олеснувањето на тесните грла за снабдување.
Владата во Берлин минатата недела прогнозира раст од 0,2 отсто за 2023 година, во споредба со претходното предвидување за намалување од 0,4 отсто. Министерот за економија Роберт Хабек сепак предупреди на можна рецесија, велејќи дека кризата што Русија ја предизвика со својата инвазија на Украина не е завршена.
Изгледите остануваат неизвесни. Инфлацијата може да се покаже тврдоглава во условите на растечки барања за повисоки плати. Поштенските работници стапија во штрајк залагајќи се за зголемување на платите за 15 отсто, а вработените во јавниот сектор исто така бараат двоцифрено покачување.
Европската централна банка е решена да се справи со зголемените цени со рестриктивна монетарна политика. Предвидено е неделава да ги подигне каматните стапки за уште 50 базични поени, додавајќи кон она што е веќе најагресивната кампања за затегнување во нејзината историја. Целосното влијание на тие мерки допрва треба да се почувствува.
