Банката на Англија (BoE) ги зголеми каматните стапки за половина поен, нагласувајќи дека ќе бидат потребни повеќе зголемувања доколку потраат знаците за инфлациска спирала.
Седуммина функционери од деветчлениот Комитет за монетарна политика на централната банка на Британија го одобрија зголемувањето на клучната каматна стапка на 4 отсто, додека двајца гласаа да нема промени. Мнозинството се согласи дека силниот раст на платите и тековниот недостиг од работници го потхрануваат ценовниот притисок во економијата.
Ваквата одлука го означи 10-то зголемување откако Банката на Англија започна со затегнување во декември 2021 година, со што клучната стапка е највисока од 2008 година.
Обврзниците во Британија ги намалија претходните добивки по одлуката, при што приносот на десетгодишните падна за седум базични поени, на 3,23 отсто. Фунтата ги намали претходните загуби во однос на американскиот долар и се тргуваше околу 1,2345 долари. Облозите на пазарот на пари прогнозираат највисока стапка од 4,5 отсто до средината на годината, во споредба со околу 4,4 отсто пред денешната одлука.
Bloomberg
Официјалните лица, предводени од гувернерот Ендрју Бејли, процениле дека економијата е веќе во рецесија, но дека падот ќе биде пократок и поплиток отколку што се предвидуваше во ноември. Ризиците за инфлацијата остануваат „значително насочени нагоре“. Комитетот укажа на рекордни спогодби околу платите годинава.
Банката на Англија проценува пад од речиси еден отсто на бруто-домашниот производ во текот на пет квартали. Тоа ќе претставува предизвик за владата на премиерот Риши Сунак, која мора да распише избори до почетокот на 2025 година. Економијата нема да закрепне на нивоата на производство од пред пандемијата барем до 2026 година и уште 500.000 работници ќе ги загубат своите работни места, предвидува Банката на Англија.
Контракцијата што ја процени Банката на Англија и натаму е помала од падот од 2,9 отсто во текот на осум квартали, проценет во ноември.
И покрај лошата заднина, се чини дека Банката на Англија го поддржува пазарниот став дека стапките ќе го достигнат врвот на околу 4,5 отсто во наредните месеци. Панелот предупреди дека „ако има докази за поупорен притисок, тогаш ќе биде потребно дополнително заострување на монетарната политика“.
Пазарот во моментов предвидува намалување на стапките следната година. Во знак дека крајот на циклусот на пораст на стапките можеби се ближи, Банката на Англија се откажа од насоките дека ќе одговори „агресивно“ доколку е потребно.
.webp){kind=icon}