.webp){kind=icon}
Бугарија рече дека нема да ги исполни критериумите за усвојување на еврото во јануари 2024 година, како што беше планирано, што е удар за напорите на најсиромашната членка на Европската Унија (ЕУ) да се интегрира подлабоко во блокот.
Црноморската земја планираше да се префрли на единствената валута една година по другата балканска земја во ЕУ, Хрватска, која се приклучи во еврозоната минатиот месец. Но Бугарија е заглавена во политичка криза, која го парализира креирањето политики и предизвика повеќекратни предвремени избори. Следното гласање, кое е закажано за 2 април, ќе биде петто во последните две години.
„Ние едноставно не ги исполнивме барањата. Доколку нема нова јасна цел за датум, тоа ќе влијае и на кредитниот рејтинг и на приносите на долгот во негативна насока“, рече денеска министерката за финансии Росица Велкова. „Последниот парламент не го одобри неопходното законодавство и владата нема да бара процена од Европската комисија (ЕК) и Европската централна банка (ЕЦБ), која е потребна за унапредување на процесот“, рече таа.
Проблемите на Бугарија при пристапувањето кон еврото
Другата цел за интеграција во ЕУ, приклучување кон Шенген-зоната, не успеа во декември поради сомневањата за способноста на Бугарија да се справи со корупцијата и да ги заштити надворешните граници на блокот. Последователните влади во Софија се залагаат за унапредување на патот кон еврото од 2016 година, во обид да го подигнат животниот стандард и да се интегрираат подлабоко во финансискиот систем на ЕУ. Земјата се соочи со голем број неуспеси, бидејќи мораше да ги надмине сомнежите меѓу земјите-членки за стабилноста на нејзиниот банкарски систем и здравјето на нејзината економија по кризата на државниот долг во соседна Грција и скандалите со перење пари во балтичките земји во еврозоната.
Бугарија со години ги исполнуваше формалните критериуми на блокот за својот буџетски дефицит и има едно од најниските нивоа на долг во ЕУ. Но политичката криза ги одложи другите подготовки, при што неколку партии, вклучувајќи ги и проруските социјалисти и националисти, побараа референдум за усвојување на единствената валута. Само една третина од бугарското население ја поддржува идејата.
Bloomberg Mercury
Велкова го повика следниот парламент да го одобри неопходното законодавство и рече дека Бугарија може да се приклучи во еврозоната уште во јануари 2025 година. Сепак, тоа може да биде тешко, бидејќи анкетите на јавното мислење не покажуваат голема желба за тоа во пресрет на гласањето.
„Можен е и претходен датум, како што е 1 јули 2024 година, а можен е и подоцнежен датум. Сè зависи од тоа дали ќе ги исполниме критериумите и кога ќе ги исполниме“, рече бугарската министерка за финансии.
