.webp){kind=icon}
Базичната инфлација во еврозоната достигна рекорд во јануари, покажуваат ревидираните податоци на Евростат објавени во четвртокот. Ова веројатно ќе ја зацементира одлуката на Европската централна банка (ЕЦБ) да ги зголеми каматните стапки за уште половина процентен поен на состанокот во март.
Без нестабилните категории како храна и енергија, цените во јануари се повисоки за 5,3 отсто во однос на првиот месец од претходната година. Вкупната инфлација беше ревидирана за 10 базични поени повеќе, на 8,6 отсто, откако податоците од Германија покажаа дека цените во таа земја се зголемиле побрзо отколку што сугерираа претходните податоци.
Bloomberg Chartmaker
Податоците покажуваат колку се отпорни ефектите на еден од најголемите ценовни шокови во Европа, што се случи откако војната во Украина вртоглаво ги зголеми цените на енергентите. Тие исто така ќе ги охрабрат претставниците на ЕЦБ што се за зголемување на каматните стапки да не се откажуваат од своите намери. Фокусот на ЕЦБ се префрли од вкупната инфлација, која забавува, на базичната инфлација, која сè уште расте. Анкетите покажуваат дека отпорноста на економијата се толкува и како доказ оти каматните стапки треба да продолжат да растат.
Официјални лица предводени од претседателката Кристин Лагард изјавија дека на следниот состанок ќе ја зголемат каматната стапка на депозитите од 2,5 на три проценти. Сега, кога одлуката е речиси сигурна, вниманието се префрла на понатамошните планови на ЕЦБ.
„Заедно со доказите дека економијата останува еластична, денешниот извештај им дава муниција на јастребите на ЕЦБ да бараат дополнително зголемување на каматните стапки“, рече Маева Казин, која ја покрива економијата на еврозоната во „Блумберг економикс“.
Пазарите на пари сега прогнозираат дека крајната каматна стапка на депозитите ќе биде 3,73 отсто, два базични поена пониска од претходниот ден. Оваа информација не се промени многу по објавувањето на податоците.
