Претседателката на Европската централна банка (ЕЦБ), Кристин Лагард, порача дека зголемувањето на каматните стапки можеби ќе треба да продолжи и по спроведувањето на планираниот потег за покачување од половина поен за две недели.
„Гледано од сегашна перспектива, можно е да продолжиме по тој пат“, изјави Лагард за шпанската телевизиска емисија „Еспејо публико“ (Espejo Publico) во четвртокот. „За колкав износ на секој состанок е невозможно да се каже во овој момент“.
Прочитајте повеќе: Базичната инфлација во еврозоната на рекордно ниво
Лагард го опиша зголемувањето во март како неопходно и многу веројатно, велејќи дека креаторите на политиката ќе направат сè за да ја вратат инфлацијата на целта од два отсто, која сега е над четири пати повисока од таа вредност.
Инфлацијата се зголемува во Шпанија и Франција
Bloomberg
Шефицата на ЕЦБ ќе претседава на состанокот каде што најверојатно ќе дојде до второ последователно зголемување на стапката од 50 базични поени, бидејќи официјалните лица ги продолжуваат напорите за борба против инфлацијата по европските податоци од неделава, кои се покажаа посилни од очекувањата. Инвеститорите сега сметаат дека депозитната стапка ќе достигне врв од 4 отсто, во однос на сегашното ниво од 2,5 отсто.
Запрашана за таканаречената терминална стапка, Лагард рече: „Вистинскиот искрен одговор е дека таа ќе се определи врз основа на податоци“. Трошоците за позајмување ќе мора да останат на нивоа што ја ограничуваат економската активност и не може да се намалат додека инфлацијата не се позиционира на целта, нагласи таа.
„Она што е многу сигурно е дека ќе направиме сè што е потребно за да ја вратиме инфлацијата на 2 отсто“, истакна Лагард.
Таа го опиша повлекувањето на растот на цените како „нестабилно“.
„Инфлацијата се намали во последните три месеци, а малку се зголеми во февруари“, рече Лагард без да прецизира на кој регион се однесува кажаното. Податоците за инфлацијата во еврозоната за минатиот месец ќе бидат објавени в четврток.
Економијата на еврозоната ќе има подобри резултати од првично очекуваните, според шефицата на ЕЦБ, која ја отфрли можноста за рецесија оваа година.
.webp){kind=icon}
