Турција овој месец ненадејно го запре транзитот за санкционираните стоки во Русија, бидејќи Европската Унија и САД вршат притисок врз сојузниците да ги поддржат мерките наметнати поради инвазијата на Русија врз Украина.
„Владата нареди од 1 март да се запре транзитот на таква стока преку Турција во согласност со санкциите“, изјави висок турски функционер, кој сакаше да остане анонимен.
„Системот за царинење на карго во Турција едноставно престана да функционира“, рече Екатерина Лазуткина, косопственичка на „Вендор карго“ (Vendor Cargo), компанија за превоз од врата до врата, царинење и општа товарна компанија што работи преку Турција. „Царинскиот систем сега ја блокира стоката наменета за Русија“, рече таа.
Во текот на минатата година Турција се покажа како едно од засолништата за руското богатство и центар за набавка на стоки, благодарение на личните односи меѓу рускиот претседател Владимир Путин и претседателот на Турција, Реџеп Таип Ердоган.
Извозот на Турција во Русија се искачи на 9,3 милијарди долари во 2022 година од 5,8 милијарди долари, колку што изнесуваше во 2021 година, што ги илустрира тешкотиите со кои се соочија САД и ЕУ за да направат обединет фронт против Путин.
„Ставот на Турција е поврзан со проширувањето на санкциите на ЕУ кон Русија“, рече Мустафа Бојачиоглу, главен извршен директор на истанбулската брокерска куќа „Субаси“ (Subasi), потврдувајќи ја блокадата. Тој рече дека немало формално соопштение ниту преоден период, што предизвика конфузија меѓу компаниите.
Споредба на пратките од Турција и ЕУ кон Русија / Bloomberg Mercury
„Слушаме дека решението би можело да биде прво да се испорачаат производите во земји што не се поврзани со санкции, како тие во Централна Азија. Не би требало да има проблем со производите што прво биле увезени во Турција, а потоа испорачани во Русија, но ние не сме сигурни во тоа, бидејќи се чини дека ограничувањата се засновани на потеклото“, рече Бојачиоглу во телефонска изјава.
„Руските транспортери сè уште се надеваат дека ситуацијата ќе се нормализира“, изјави телефонски Валерија Савенкова, комерцијална директорка на „Трансазија логистикс“ (Transasia Logistics) со седиште во Москва, компанија што врши испораки од Турција.
.webp){kind=icon}
