.webp){kind=icon}
Цените на куќите во Велика Британија паднаа со најостро темпо на годишно ниво од 2009 година, откако покачените каматни стапки ги зголемија трошоците за задолжување, изјави еден од најголемите хипотекарни заемодавци.
Просечната цена на домот во март падна за 3,1 отсто споредено со истиот месец лани, што е значително поостро од падот од 2,2 отсто, колку што очекуваа економистите, објави денеска „Нешнвајд билдинг сосаети“ (Nationwide Building Society). Цените паднаа за 4,6 проценти од нивниот врв достигнат во август лани, со што просечната вредност сега е 257.122 фунти (318.320 долари).
Овие бројки ги зајакнуваат доказите дека зголемувањето на стапката на Банката на Англија го забавува пазарот, кој остана активен низ рецесијата што ја придружуваше пандемијата. Централната банка ја зголеми својата основна стапка на 4,25 проценти во серија чекори од близу нула, колку што изнесуваше на крајот од 2021 година, а целта е да ја заузди и контролира инфлацијата.
Процентуална промена на цените на куќите во Велика Британија / Bloomberg Mercury
„Ќе биде тешко на пазарот да се врати голем раст во блиска иднина, бидејќи довербата на потрошувачите останува слаба, а буџетите на домаќинствата се под притисок од високата инфлација. Достапноста на становите исто така останува затегната, каде што хипотекарните стапки се далеку над најниските што преовладуваа во истиот период минатата година“, рече Роберт Гарднер, главен економист на „Нешнвајд“.
Податоците за недвижностите во Велика Британија се помрачни од некои извештаи што укажуваат дека уште има одредена сила на пазарот.
Иако одобрувањата за хипотеки, пресметани од Банката на Англија, се зголемија во февруари, сепак остануваат под највисоките нивоа од минатата година.
Цените во Лондон се намалија за 4,1 отсто на годишно ниво, на просечни 511.293 фунти, а најбрзо паднаа цените во Источна Англија и Шкотска. Тоа е седми по ред месечен пад на цените, овој пат за 0,8 отсто, што е повеќе од двојно од темпото што го очекуваа економистите.
„Пазарот на домување минатата година достигна пресврт како резултат на турбуленцијата на финансискиот пазар. Оттогаш активноста остана придушена“, рече Гарднер.
