.webp){kind=icon}
Во првиот квартал годинава банките во еврозоната го забавиле кредитирањето повеќе од очекуваното по зголемените трошоци за задолжување и во услови на неодамнешни турбуленции во банкарскиот сектор во САД и околу „Кредит Суис“ (Credit Suisse).
Според извештајот на Европската централна банка (ЕЦБ), условите за кредитирање значително се заострени во првиот квартал.
„Затегнувањето на кредитирањето на компаниите и домаќинствата беше посилно од очекуваното во претходниот квартал и укажува на слабеење на кредитната динамика“, соопшти ЕЦБ.
Падот на побарувачката за кредити кај компаниите е посилен од очекуваното и најголем по светската финансиска криза.
Извештајот на ЕЦБ е првиот конкретен показател за ефектите од колапсот на банката „Силикон валеј“ (СВБ) и преземањето на „Кредит Суис“ од страна на УБС (UBS).
Динамика на кредитирање во еврозоната во последните 15 години
Bloomberg Mercury
Претставници на ЕЦБ посочија дека заострувањето на условите за кредитирање може да поттикне помало зголемување на каматните стапки на состанокот в четврток, кога се очекува управниот одбор на ЕЦБ да одлучи помеѓу зголемување на стапката на депозитите за 25 или 50 базични поени. Омекнувањето на динамиката на раст станува сè поверојатно откако податоците за април покажаа дека базичната инфлација забави за првпат во 10 месеци.
Прочитајте повеќе на: Базичната инфлација во еврозоната забави за првпат по 10 месеци
Според најновата анализа објавена од „СП глобал“ (S&P Global), економијата на еврозоната покажува знаци на забрзување на почетокот на вториот квартал, главно поради услужниот сектор. Некои претставници на ЕЦБ може да го толкуваат ова како потреба за натамошно зголемување на каматните стапки за да се врати инфлацијата до целта од два процента.
