.webp){kind=icon}
Турските инвеститори се обложуваат дека враќањето на поранешниот банкар од Волстрит, Мехмет Шимшек, на позицијата економски цар ќе навести промена кон поконвенционални економски политики. Како што беше соопштено синоќа, претседателот Реџеп Таип Ердоган го назначи Шимшек, поранешен стратег на „Мерил Линч“ (Merrill Lynch), за свој нов министер за финансии.
Долгот на Турција и акциите се зголемија во изминатата недела поради зголемените очекувања за неговото доаѓање. Иако остануваат отворени прашањата за способноста на Шимшек веднаш да се насочи кон политиката, многу инвеститори полагаат надежи во него дека ќе ги смени неконвенционалните економски модели на Ердоган, кои се гледаат како виновник за егзодусот на инвеститорите и најлошата инфлациска криза во последните децении. Во своите први забелешки по назначувањето, Шимшек сигнализираше враќање на конвенционалните политики.
„На Турција не ѝ останува друг избор освен враќање на рационалното креирање политика. Транспарентноста, предвидливоста, конзистентноста и компатибилноста со меѓународните норми ќе бидат основните принципи“, рече тој на церемонијата на примопредавање на функцијата во Анкара.
Стратезите на „Ситигруп“ (Citigroup Inc.), вклучувајќи го и Донато Гуарино, иако остануваат скептични за среднорочните перспективи на економијата, сметаат дека назначувањето на Шимшек ќе понуди поттик на пазарот.
Bloomberg Mercury
Турските обврзници во долари во последните денови ги надминаа поголемиот дел од нивните конкуренти на пазарите во развој. Главниот берзански индекс на земјата минатата недела се зголеми за 12 проценти, со што го забележа најсилното остварување од октомври.
Сомнежите остануваат
Штом ќе стивне еуфоријата, инвеститорите ќе внимаваат дали Ердоган ќе го отстапи авторитетот во управувањето со економијата, откако претходно избрка тројца гувернери на централните банки од 2019 година борејќи се за пониски каматни стапки.
„Мехмет Шимшек има голем кредибилитет кај глобалната инвестициска јавност. Се разбира, прашањето е колку тој ќе биде ослободен од влијание“, рече Тод Шуберт, раководител за истражувања за фиксен приход од Дубаи во Банката на Сингапур (Bank of Singapore).
Со тоа мислење се согласи и Хенрик Гулберг, макроекономист во „Коекс партнерс“ (Coex Partners Ltd.), додавајќи дека Ердоган ќе треба да покаже дека Шимшек е повеќе од симболично назначување направено за да ги поттикне пазарите по изборите.
Во меѓувреме, постојат знаци дека централната банка се повлекува од своите скапи интервенции за лирата, која во изминатата недела ослабна за 4,6 проценти, со што се спушти на рекордно ниско ниво од 20,9 во однос на американскиот долар. Интервенциите беа дел од кампањата на Ердоган да обезбеди стабилност на девизниот курс.
Bloomberg Mercury
Трговците очигледно очекуваат поголема нестабилност, имајќи предвид дека дополнителните трошоци за заштита од слабеење на лирата во наредните шест месеци во петокот се зголемија на рекордни 21,7 процентен поен. Тоа е двојно повеќе од јануарски нивоа од околу 10,7.
Марек Дримал, водечки стратег во „Сосиете женерал“ (Societe Generale), рече дека назначувањето на Шимшек и можноста за повисоки каматни стапки и приходи од летниот туризам ќе спречат голема распродажба на лирата во наредните месеци. Сепак, долгорочно тој предупреди дека без корекции на надворешните нерамнотежи на Турција и кредитната експанзија, лирата може повторно да западне во неволја во текот на следната зима.
