Европа ќе треба да намали дури 30 отсто од потрошувачката на гас до средината на февруари, доколку се запре протокот од Русија.
Според Фатих Бирол, извршен директор на Меѓународната агенција за енергетика / International Energy Agency (ИЕА), ќе бидат неопходни широко распространети намалувања доколку Москва одлучи целосно да го запре протокот. Тоа е сценарио за кое лидерите треба да се подготвуваат, рече тој како одговор на прашања испратени по електронска пошта.
„Во зависност од тајмингот, целосното прекинување на испораките на руски гас во Европа може да резултира со тоа што нивото на полнење на складиштата ќе биде далеку под просекот пред зимата, оставајќи ја ЕУ во многу ранлива позиција“, рече Бирол. „Во сегашниот контекст, не би го исклучил целосното прекинување на извозот на гас за Европа од Русија“, нагласи тој.
Европа се обидува да ги зајакне резервите на гас за да има залихи пред зимата. Ова изгледа како поголем предизвик откако Москва претходно овој месец го намали протокот преку гасоводот „Северен тек“ до Германија за 60 отсто, поради наводни технички проблеми. Ситуацијата со снабдувањето со гас во ЕУ може да се влоши доколку Русија целосно го запре гасот за регионот во следните недели. Проекциите на блокот покажуваат дека иако стапките на полнење на складиштата во моментот се на пат да достигнат 90 отсто до 1 ноември, евентуален прекин би го намалил тоа ниво под 75 отсто.
Ова би резултирало со значително повисоки цени на бензинот, според Бирол. Референтните европски фјучерси за гас веќе се повеќе од трипати зголемени од ова време минатата година, според податоците на ICE Endex.
Bloomberg
Европа треба да се фокусира на тековно намалување на употребата на гас во индустријата и домаќинствата за да овозможи што е можно поголеми количини од снабдувањето да заврши во складиштата, смета Бирол.
Германија, најголемата европска економија, изнаоѓа начини како да ја поттикне индустријата да користи помалку. Земјата планира да воведе систем на аукција што ќе започне ова лето за да им плаќа на индустриските потрошувачи на гас доколку заштедат гориво. Владите во Берлин и Копенхаген ги охрабрија луѓето да користат помалку дома со пократко туширање.
.webp){kind=icon}
Во моментов нема коментари за веста. Биди прв да коментира...