Гасот ја засени нафтата, станува главен ризик за инфлацијата во Европа

Природниот гас ја престигна нафтата и стана најголемата грижа за трговците со европски обврзници, бидејќи намалените залихи на клучното гориво се закануваат повторно да ја поттикнат инфлацијата.

Цените на европскиот гас се близу највисоките нивоа во последните пет месеци, а зимските договори чинат повеќе од двојно во споредба со пред една година. Приносите на 10-годишниот германски и британски долг достигнаа нивоа невидени со децении, иако суровата нафта Брент се тргува 30 отсто под максимумот достигнат поради војната меѓу САД и Иран.

Инвеститорите се загрижени дека растот на цените на гасот повторно ќе ја разгори инфлацијата, принудувајќи ги централните банки поагресивно да ги зголемуваат каматните стапки отколку што пазарите моментално очекуваат. Гасот има централна улога во економијата на регионот, со удел од 21 отсто во енергетскиот микс на ЕУ и меѓу 25 и 35 отсто во Велика Британија.

„Цената на природниот гас е порелевантна за Велика Британија и Европа и никогаш навистина не се опорави за време на ниту еден од прекините на огнот и продолжува да расте“, рече Ема Моријарти, портфолио-менаџер во „ЦГ асет менаџмент“ (CG Asset Management). Компанијата го зголеми уделот на државните обврзници поврзани со инфлацијата во својот главен фонд со повеќе класи на средства на речиси рекордни 49 отсто, поттикната од ризикот од продолжени ценовни притисоци.

Приносите на обврзниците нагло пораснаа и поради други грижи, меѓу кои неодржливите јавни финансии, бранот задолжување од хиперскалерите и непредвидливото креирање политики во САД. Но учесниците на пазарот велат дека гасот сега е најголемиот ризик поврзан со енергијата за изгледите за каматните стапки во Европа и Велика Британија, иако цените остануваат далеку под максимумите достигнати откако Русија ја нападна Украина во 2022 година.

„Цените на природниот гас ја презедоа улогата на клучен двигател на приносите“, рече Џејми Серл, стратег за европски каматни стапки во „Ситигруп“ (Citigroup). „Од почетокот на јули, движењето на обврзниците продолжи да ги следи цените на природниот гас, а нешто помалку внимание се обрнуваше на нафтата“, додаде тој, посочувајќи на корелацијата со референтните 10-годишни обврзници.

Приносите на германските обврзници и цените на гасот растат истовремено

Европските пазари на обврзници од јули се одвоија од движењето на цените на нафтата

Извор: Bloomberg

Војната на Блискиот Исток ги натера владите и компаниите да го одложат повторното полнење на складиштата, надевајќи се дека конфликтот ќе биде краткотраен и дека цените ќе се намалат. Во меѓувреме, екстремните горештини ја зголемија побарувачката во текот на летото, поради што складиштата за гас се полни само 63 отсто, најниско ниво за овој период од годината од 2009 година.

Низ Ормускиот Теснец вообичаено минуваат околу 20 отсто од глобалната понуда на ЛНГ и, за разлика од нафтата, нема алтернативни рути преку кои тој гас може да стигне до пазарот, а има и малку стратешки резерви што би можеле да помогнат да се надомести недостигот.

Стратезите на „РБЦ капитал маркетс“ (RBC Capital Markets), меѓу кои и Мегум Мухиќ, напишаа во белешка на 13 август дека „се појавува потенцијална енергетска криза на пазарите на гас“, која има „многу пошироко прелевање врз инфлацијата отколку нафтата“.

 

Асиметрични ризици

Европската централна банка веќе еднаш ги зголеми каматните стапки оваа година, додека Банката на Англија ги задржа непроменети. Пазарите на пари очекуваат по едно зголемување на каматните стапки од двете централни банки до крајот на оваа година, по што би следувало уште едно до септември 2027 година.

Некои учесници на пазарот велат дека тие очекувања можеби ќе треба да се променат, со оглед на ризикот од повисоки цени на гасот и отсуството на договор меѓу САД и Иран за повторно отворање на Ормускиот Теснец.

„Оваа најнова закана за инфлацијата, која произлегува од тешкотиите со складирањето енергија и влијанието на летниот топлотен бран и сушата, нè прави повнимателни“, рече Стивен Бароу, раководител на стратегијата за Г10 во „Стандард банка“ (Standard Bank). „Подготвени сме да ги ревидираме нагоре нашите прогнози за каматните стапки.“

Дури и напредок на Блискиот Исток што би ги намалил цените на нафтата можеби нема да биде доволен за да го ублажи притисокот врз каматните стапки доколку продолжи загриженоста за понудата на гас, велат стратезите на РБЦ.

„Ова го прави профилот на ризик за каматните стапки асиметричен: ограничен потенцијал за раст на пазарите, значителен ризик од пад доколку ситуацијата ескалира“, напишаа тие.