Еврозоната речиси во стагнација, повторно мириса на рецесија

Економскиот моментум во еврозоната речиси запре во јуни, сигнализирајќи крај на заживувањето во монетарната унија што се наѕираше по зимската криза. 

Индексот на менаџерите за набавка(ПМИ), изготвен од „СиП Глобал“ (S&P Global), падна на најниско ниво во последните пет месеци на 50,3, додека аналитичарите очекуваа да изнесува 52,5. Падот беше предводен од Франција, која е погодена од штрајкови, иако голема улога одиграа и германските фабрики, кои се соочуваат со проблеми. 

Еврото имаше пад од 0,9 проценти на 1,0857 долари, додека приносите на двегодишните германски обврзници - меѓу најчувствителните на промените во монетарната политика - паднаа на најниско ниво во последните седум недели на 3,11 проценти, што е намалување од 11 базични поени. Пазарите на пари сега не очекуваат натамошни зголемувања на каматните стапки со иста сигурност како претходно. Тие прогнозираат дека каматата на депозитите ќе достигне врв до границата од четири проценти до крајот на годината. За споредба, вчера се очекуваше оваа камата да достигне 4,07 проценти. 

Иако еврозоната можеби направи доволно за да излезе од благата рецесија што ја претрпе помеѓу октомври и март, „СиП“ предупреди дека има зголемени шанси таа да се пролонгира во наредниот квартал - особено ако се земе предвид дека Европската централна банка продолжува да ги зголемува каматните стапки. 

„Дури и ако нашето основно сценарио за благ раст на еврозоната во вториот квартал стане реалност, трендот на намалување на композитниот ПМИ укажува на тешка втора половина од годината бидејќи компаниите во сите сектори се соочуваат со намалување на нарачките“, рече Сајрус де ла Рубија, главен економист на Хамбуршката комерцијална банка. 

Еконосмката активност во еврозоната речиси стагнира во јуни/извор:Bloomberg

Производството остана „главна област на слабост“ во јуни, иако експанзијата на услужниот сектор „нагло забави“ бидејќи неодамнешното закрепнување на потрошувачката го изгуби моментумот. 

Сепак, разочарувачките податоци за економската активност беа придружени со „значително заладување на инфлаторните притисоци“, според „СиП“. Оттаму велат дека зголемувањето на влезните трошоци е со најбавна стапка од декември 2020 година и дека зголемувањето на продажните цени на стоките и услугите е со најбавна стапка од март 2021 година. 

Тоа ќе и даде надеж на ЕЦБ, која се приближува кон крајот на својата историска кампања за зголемување на каматните стапки иако неодамна најави дека зголемувањата може да продолжат и по состанокот во јули.

„Ако ЕЦБ требаше да ги контролира само цените на производите, тогаш Франкфурт веќе ќе наздравеше за крајот на инфлацијата“, рече Де ла Рубија. „Но, во најважниот дел од економијата, услужниот сектор, цените продолжуваат да растат и затоа базичната стапка на инфлација толку бавно се намалува“, додаде тој. 

Што вели „Блумберг Економикс“(Bloomberg Economics)... 

„ЕЦБ сè уште е фокусирана на покачената базична инфлација, мерило кое го смета како поважно од другите, а забавувањето на економскиот раст веројатно нема да го спречи повторното зголемување на каматите. Очекуваме да има две конечни зголемувања на стапката од по 25 базични поени во јули и септември, по што камата депозитите ќе достигне четири проценти“, рече Дејвид Пауел, виш економист за еврозоната.

Податоците на ПМИ претходно покажаа пад во Франција и губење на моментумот за Германија.

Податоците за Велика Британија, Јапонија и Австралија покажаа побавен раст, а бројките од САД се очекува да покажат сличен тренд.

Во моментов нема коментари за веста. Биди прв да коментира...

Остави коментар