Гарник Казаријан, 31-годишник од Москва, минатата година поминал речиси три месеци собирајќи јагоди на фарма во Шкотска. Неговите надежи да се врати во Обединетото Кралство оваа сезона биле уништени кога една фирма за ангажирање сезонски работници го откажала сертификатот за спонзорство што му бил потребен за да добие виза.
„Беше навистина разочарувачки“, изјавил Казаријан, кој проценува дека потрошил вкупно 1.200 фунти (1.477 долари) за апликацијата и патувањето на интервјуа за себе и за својата девојка.
Додека Русите официјално се уште се добредојдени во Обединетото Кралство, долгото чекање за визи и несигурноста околу геополитичката ситуација ги прави фирмите кои регрутираат кадри да се претпазливи за вработување. Тоа го зголемува недостигот од сезонски земјоделски работници во земјата кој и така се влоши по Брегзит. Ретко која компанија признава дека не вработува Руси, некои избегнувале одговор, а други потврдиле дека тој процес е забавен. Македонија до сега не беше една од неколкуте топ земји за сезонска работа во Обединетото Кралство, но една од компаниите која работи на барање работници тврди дека во моментот се регрутираат кадри од земјава.
„Регрутираме само луѓе кои живеат во Украина, Таџикистан, Узбекистан, Киргистан, Непал, Северна Македонија и Турција, изјавија за Bloomberg од Про-Форс.
Дали тоа што Руси нема да работат толку, а Украинците не доаѓаат да работат во оваа островска земја како сезонски работници затоа што остануваат дома на бојните полиња, ќе значи и повеќе Македонци таму ќе покаже статитиката за второто полугодие. Украина со години е на врвот земји од каде има најмногу сезонски работници во Кралството.
„Шемата за сезонски работници е отворена за сите националности, така што не е во ред да се тврди дека некој ќе биде одбиен поради неговата националност“, изјави портпаролот на Министерството за внатрешни работи на Обединетото Кралство.
Тројца од давателите на услуги кои обезбедуваат работници за програмата за сезонски работници според практиката, веќе ги одбегнуваат Русите. Zoloterra Ltd., која работи со Concordia Ltd. на својата веб-страница има програма за вработување во која стои дека „работи како и обично за граѓаните на комонвелтот на независни држави (освен Русија и Белорусија).
Пејман Зонузи, адвокат за имиграција во Армази со седиште во Лондон, изјави дека бил во контакт со околу 140 Руси на кои им биле одбиени визите, но дека очекувал вкупниот број да е многу поголем. Исто така, компаниите ги повлекувале сертификатите за спонзорство, кои им овозможуваат на Русите да аплицираат за визи, додека нивните валидни апликации чекале во Министерството за внатрешни работи.
Наспроти тоа, половина од одгледувачите и производителите на храна во Велика Британија очекуваат да се мачат со регрутирање сезонски работници со пониска квалификација во следните шест месеци
Кои се условите?
За да добиете виза за сезонска работа треба да имате 18 или повеќе години и најмалку 1.270 фунти на сметка во последните 28 дена или вашиот работодавец се согласил да ги покрие вашите трошоци во текот на првиот месец во Обединетото кралство во износ од најмалку толку пари. Се работи земјоделска работа.
Надоместокот за апликација за виза за привремена работа - сезонски работник моментално изнесува 244 фунти. Оваа такса автоматски ќе се намали за 55 фунти доколку сте државјанин на Македонија и на уште неколку земји односно Австрија, Белгија, Хрватска, Република Кипар, Чешка, Данска, Финска, Франција, Германија, Грција, Унгарија, Исланд, Ирска, Италија, Латвија, Луксембург, Малта, Холандија, Норвешка, Полска, Португалија, Словачка, Шпанија, Шведска или Турција.
.webp){kind=icon}
