Пад на активноста во еврозоната, сигнал за рецесија

Активноста на приватниот сектор во еврозоната неочекувано се намали за прв пат по затворањето за време на пандемијата од почетокот на 2021 година, што сигнализира  дека на хоризонтот надоаѓа рецесија.

Истражувањето меѓу менаџерите за набавки на S&P Global во јули покажа пад на најниско ниво во последните 17 месеци. Падот беше поттикнат од влошувањето на производството и застојот на растот на услужниот сектор. Економистите очекуваа блага експанзија.

„Најголема загриженост има околу маката на производството, каде што производителите известуваат дека послабата од очекуваната продажба доведе до невиден пораст на непродадените залихи“, рече Крис Вилијамсон, економист во S&P Global.

Податоците ја нагласуваат ранливоста на економијата на еврозоната која сега се соочува со нагло повлекување на стимулативните средства по зголемувањето на каматните стапки на Европската централна банка за половина поен, прво зголемување во повеќе од една деценија.

„Разбираме дека овие одлуки се очекува да значат побавен економски раст поради поскапите заеми и, за жал, несоздадените, а понекогаш и изгубените работни места“, рече членот на Управниот совет на ЕЦБ, Мадис Мулер во блог пост во петокот. Тој додаде дека последиците од постојаното пребрзо зголемување на цените би биле уште полоши.

Знаците за забавување на растот ќе го засилат растечкиот хор на економисти кои предвидуваат рецесија. Голема е загриженоста за снабдувањето со енергија бидејќи Русија го намалува протокот на природен гас како одговор на западните санкции поради нејзината инвазија на Украина.

Еврото ослабе порано кога индексот покажа дека германската активност неочекувано се намалува, додека францускиот извештај исто така сигнализираше загриженост за економски пад.

Претседателката на ЕЦБ, Кристин Лагард, во четвртокот рече дека е важно да се спречи зацврстување на очекувањата за повисоки цени, иако таа призна дека економијата слабее.

Професионалните прогнозери анкетирани од ЕЦБ на почетокот на овој месец ја намалија својата перспектива за раст следната година на 1,5 од 2,3 проценти, според кварталниот извештај објавен денеска. Тие, исто така, ја зголемија својата долгорочна проценка за инфлацијата на 2,2 проценти.

Според извештајот, компаниите ги намалуваат своите изгледи, го ограничуваат купувањето на инпути и се повлекуваат од нови вработувања. Вилијамсон предвиде дека производството веројатно ќе треба да се намали бидејќи фирмите се прилагодуваат на опкружувањето со послаба побарувачка.

„Со оглед на тоа што ЕЦБ ги зголемува каматните стапки во време кога опкружувањето на побарувачката е она што вообичаено би доживеало олабавување на политиката, повисоките трошоци за задолжување неизбежно ќе придонесат за ризиците од рецесија“, рече тој.

Во моментов нема коментари за веста. Биди прв да коментира...

Остави коментар