Германија е во рецесија и нејзината економија најверојатно нема да расте годинава, покажува истражувањето на „Блумберг“.
Бруто-домашниот производ ќе се намали за 0,1 отсто во првиот квартал, покажува истражувањето спроведено од 8 до 14 март. Пред еден месец аналитичарите предвидуваа стагнација за првиот квартал.
И Бундесбанк наведува дека Германија најверојатно ќе забележи шестмесечен пад на економската активност, иако беше нагласено дека е малку веројатен посериозен пад.
Слично на тоа, Министерството за економија објави дека повеќето институти „очекуваат БДП повторно да опадне во првиот квартал на 2024 година“.
„И покрај позитивните движења во индустриското производство, градежништвото и надворешнотрговската размена на почетокот на 2024 година, сè уште не се гледа забележително економско закрепнување“, се наведува во месечниот извештај. „Причината се сè уште слабата домашна побарувачка, високите финансиски трошоци и лошото економско расположение кај домаќинствата и компаниите“, се додава во извештајот.
Bloomberg
Испитаниците во анкетата на „Блумберг“ исто така ја намалија својата проекција за 2024 година во целина, сега очекувајќи раст од само 0,1 отсто.
Ова е во согласност со предупредувањето на Министерството за економија дека „забележлив економски раст не се очекува до вториот дел од годината, кога стапките на инфлација ќе продолжат да опаѓаат, платите и приходите ќе растат, а надворешната трговија ќе продолжи позитивно да влијае на растот со стабилен пазар на трудот“.
Податоците што ќе бидат објавени неделава може малку да го подобрат расположението на економистите. Истражувањето на ЗЕВ (ZEW) за очекувањата на инвеститорите и индексот за деловна клима на „Ифо“ се очекува да покаже дека работите се подобруваат.
„Германската економија се соочува со огромни предизвици“, изјави Мартин Белчев од „Фронтиер“ (Frontier) за „Блумберг“. „Германија ги изгуби евтината енергија од Русија, пристапот до пазарот во Кина и речиси бесплатната безбедносна гаранција од САД“, рече тој.
.webp){kind=icon}
