БоЕ уште еднаш ги задржа каматите, но се подготвува за намалување

Двајца од најжестоките јастреби на Банката на Англија (БоЕ) ја повлекоа својата поддршка за зголемување на каматните стапки, a Централната банка на Британија петти состанок по ред гласаше да ја задржи политиката непроменета.

Кетрин Ман и Џонатан Хаскел се приклучија на мнозинството од 8 спрема 1 во Комитетот за монетарна политика за да се задржат стапките на највисоко ниво во последните 16 години, на 5,25 отсто, што е најнов знак дека БoЕ се движи кон олеснување на политиката подоцна годинава. Гласањето претставуваше првпат од септември 2021 година ниту еден член на панелот да не поддржи зголемување.

Сепак, гувернерот Ендрју Бејли во својата изјава предупреди дека банката „сè уште не е до точката во која може да ги намали каматните стапки“. Пораката на банката дека официјалните лица „ќе следат“ колку долго стапките треба да се одржуваат на нивното сегашно ниво, остана непроменета.

Фунтата падна, а трговците ги зголемија облозите за намалување на каматните стапки годинава, целосно вреднувајќи три намалувања од по четвртина поен за првпат во еден месец. Британските обврзници ги зголемија добивките, а фунтата падна по одлуката. Приносот на двегодишните обврзници беше намален за 11 базични поени, додека стерлингот се тргуваше за 0,4 отсто послабо, на 1,2738 долари.

Инвеститорите го очекуваат првото намалување на стапката на БоЕ во август, но веруваат дека има над 50 отсто шанси и за потег во јуни. Синоќешниот сигнал на Банката на федерални резерви (Фед) дека во САД годинава се очекуваат три кратења помогна да се промени ситуацијата во Британија.

Свати Дингра втор состанок по ред гласаше за намалување за четвртина поен, единствениот глас на банката за олабавување на политиката сега. Остатокот од комитетот, вклучувајќи го и Бејли, го поддржа оставањето на стапките непроменети. Ман и Хаскел ги изненадија инвеститорите бидејќи минатиот месец гласаа за повисоки стапки, што ги поттикна пазарите да ги намалат облозите за пониски стапки во последните неколку недели.

„Иако Комитетот месецов гласаше да се задржат стапките непроменети, оптимизмот околу БДП заедно со трендот на намалување на инфлацијата укажува дека тие би можеле да почнат да ги намалуваат стапките порано од очекуваното - можеби веќе во мај“, рече Џо Нелис, економски советник во МХА (MHA).

Во записникот се наведува дека Комитетот прифаќа дека политиката може да остане рестриктивна дури и ако стапките се намалат со оглед на тоа дека тие веќе се на рестриктивна територија.

За повеќе детали прочитајте го текстот на „Блумберг“.

Во моментов нема коментари за веста. Биди прв да коментира...

Остави коментар