Инфлацијата во Обединетото Кралство (ОК) во август изнесува 2,2 проценти, што е само малку повисоко од целта на тамошната централна банка растот на цените да изнесува два отсто. Тоа ќе ги зацементира ставовите на креаторите на монетарната политика во однос на очекуваното кратење на каматните стапки, кое е планирано кон крајот на годинава. Статистичките податоци се на иста линија како и очекувањата на економистите на „Блумберг“.
Bloomberg Mercury
Движење на индексот на цени и услуги во Обединетото Кралство
Бројките веројатно ќе ја одржат Банката на Англија (Bank of England) на вистинскиот пат за дополнително олабавување на политиката во наредните месеци, откако на почетокот од август за првпат од пандемијата ги намали каматните стапки врз основа на олабавувањето на базичната инфлација. Тука е важно да се напомене дека новата лабуристичка влада се залага за пониска инфлација и трошоци за задолжување со цел да помогне во поттикнувањето на растот, да се подобрат јавните услуги и да се зајакне животниот стандард.
Инфлацијата на услугите, клучен показател што ја загрижува британската централна банка, во август се зголеми на 5,6 проценти, додека во јули изнесуваше 5,2 отсто. Сепак, на подолг период се очекува и оваа ставка да закрепне, односно негативниот тренд да се покаже како привремен.
Во меѓувреме фунтата зајакна за 0,2 проценти, достигнувајќи ниво од 1,3183 долар по објавувањето на статистичките податоци, при што инвеститорите се фокусираа на сѐ уште високата инфлација на услугите, која ги заматува изгледите за агресивно монетарно олеснување.
Што вели „Блумберг економикс“?
„Покачувањето на инфлацијата на услугите беше значајна карактеристика на извештајот за индексот на цени од август, но веројатно нема да ја загрижи Банката на Англија. Порастот на таа стапка беше поттикнат од нестабилните авионски билети, а показателот продолжува да се движи под августовските прогнози на централната банка. И покрај тоа, ние сè уште мислиме дека се мали шансите Банката на Англија да ја намали стапката в четврток. Следното намалување најверојатно ќе дојде во ноември“.
Одлуката на Банката на Англија неделава ќе биде објавена еден ден откако се очекува американските Федерални резерви (Фед) да го започнат сопствениот циклус на олабавување на монетарната политика поради стравувањата за кондицијата на американската економија.
.webp){kind=icon}
