Приватниот сектор на еврозоната повторно во пад

Економијата во приватниот сектор на еврозоната се намали првпат од март, како што заврши стимулот од Олимписките игри во Франција, но и поради сè подлабокиот пад на производството. Тоа ја зголеми загриженоста дека блокот е на работ на исцрпеност во својот пат кон закрепнување.

Индексот на менаџери за набавки на „Ес енд Пи глобал“ (S&P Global) падна на 48,9 во септември од 51 претходниот месец, што е под прагот од 50, кој ја дели експанзијата од контракцијата, покажаа податоците во понеделникот. Аналитичарите очекуваа дека овој показател ќе се спушти само незначително, на 50,5.

Клучниот сегмент на германската крива на принос се нормализира по објавувањето на податоците, бидејќи трговците се обложија дека Европската централна банка (ЕЦБ) ќе мора да го забрза темпото на намалување на каматните стапки за да ја поддржи економијата на 20-те земји. Приносот на двегодишните обврзници падна под приносот на десетгодишните обврзници во понеделникот, со што разликата помеѓу двата „ривала“ се намали на ниво над нулата, првпат од ноември 2022. Еврото исто така се слизна.

Производството во 20-те земји од блокот веќе почна да слабее во второто тримесечје, а потрошувачите сè уште ги стегаат ремените, иако намалувањето на инфлацијата и растот на платите им одат во прилог. Слабата глобална побарувачка, особено од Кина, исто така врши притисок врз фабриките. Проблемите кај германските производители на автомобили, како што е „Фолксваген“ (Volkswagen AG), дополнително ги нагласуваат овие предизвици.

„Еврозоната се движи кон стагнација“, вели Сирус де ла Рубија, економист на Хамбуршката комерцијална банка (Hamburg Commercial Bank). „Со оглед на брзиот пад на новите нарачки и заостатокот на порачки, не е потребна голема имагинација за да се предвиди понатамошно слабеење на економијата“.

Некои претставници на ЕЦБ се сè позагрижени поради бавниот импулс и предупредуваат дека цврстата монетарна политика не смее предолго да ја задушува економијата; тие сè уште најавуваат дека веројатно ќе ги остават каматните стапки непроменети на нивната следна средба, бидејќи во септември реализираа второ намалување годинава.

Сепак, некои велат дека драстична економска промена може да ги промени и нивните ставови. Пазарите на пари моментално се обложуваат на дополнително олеснување од 44 базични поени во 2024 година, со 40 отсто шанси за промена во октомври.

Што вели „Блумберг економикс“...

„Сложениот PMI (индекс на менаџери за набавки) укажува на влошување на економските изгледи. Делумно, тоа го одразува враќањето во реалноста во Франција по завршувањето на Олимписките игри во Париз. Очекуваме раст на еврозоната од 0,2 процента во третиот квартал, без промени во споредба со вториот квартал. За Европската централна банка, нагласеното забавување на растот би било непожелно. Ако се појават дополнителни докази за забавување, тоа би можело да значи дека октомврискиот состанок би можел да биде поинтензивен“, вели Џејми Раш, водечки економист за Европа во „Блумберг економикс“.

Голем дел од слабоста на еврозоната е последица на Германија, чија производствена индустрија се соочува со комбинација на слаба глобална побарувачка, растечка конкуренција од Кина и структурни проблеми на домашен терен. Композитниот PMI во Германија падна на 47,2 од претходните 48,4, при што фабриките забележаа побрзо намалување, а услужниот сектор е речиси во застој.

„Овие загрижувачки бројки веројатно ќе ја интензивираат тековната дебата во Германија за ризикот од деиндустријализација и што би требало да направи владата по тоа прашање“, вели Де ла Рубија.

Меѓутоа, замавот е забавен и во Франција, каде што порастот поврзан со Олимписките игри брзо исчезна, а активностите во услужниот сектор се намалија. Вкупниот показател на активностите навести уште една контракција по порастот во август.

Надвор од двете најголеми економии на еврозоната, производството продолжи да расте, но со најбавната стапка од јануари, објави „Ес енд Пи глобал“. Инфлацијата во регионот се намали, што ги ублажи притисоците врз влезните и излезните цени.

Намалената активност влијаеше и на пазарот на трудот, каде што производителите го намалуваа бројот на вработени со најбрза стапка во повеќе од четири години. Вработувањето во услужниот сектор продолжи да расте, но со најбавна стапка од август 2023 година.

„Очекуваме официјалните податоци за вработеноста во еврозоната, кои досега беа стабилни, да се влошат во наредните месеци, иако демографските трендови би требало да обезбедат поголема стабилност отколку при претходните падови“, рече Де ла Рубија.

Со оглед на тоа дека индексите PMI пристигнуваат на почетокот од месецот, пазарите внимателно ги следат, бидејќи тие се добри показатели за откривање на економските трендови и пресвртни точки. Анкетите за деловната клима понекогаш може да бидат непостојани, бидејќи го мерат влијанието на сите индустрии, наместо да се фокусираат на индивидуалното значење.

Пошироко, композитниот PMI во Велика Британија падна повеќе од очекуваното, но остана цврсто во фаза на експанзија. Американските податоци ќе бидат објавени подоцна, а економистите очекуваат во голема мера непроменето отчитување од 54,3.

Во моментов нема коментари за веста. Биди прв да коментира...

Остави коментар