.webp){kind=icon}
Норвешка е подготвена да ги зголеми трошоците за задолжување на највисоко ниво во последните десетина години, бидејќи неочекувано брзата инфлација ги доведе во прашање плановите за повеќекратно постепено зголемување.
Централната банка утре ќе ја зголеми својата клучна каматна стапка за половина процент, на 1,75 отсто, проценуваат најголем дел од аналитичарите кои ги анкетираше Блумберг. Тоа ќе биде највисока каматна стапка од март 2012 година.
Норвешка годинава веќе ја зголеми каматната стапка за 0,75 проценти. Со новото покачување од половина процент Централната банка на Норвешка ќе се изедначи или приближи кон агресивните чекори што ги преземаат водечките монетарни власти во светот, а чија цел е да ја зауздаат брзорастечката инфлација. Тоа, исто така, ја покажува итноста за корекција на каматните стапки, со оглед на тоа што во јуни Норвешка ја зголеми стапката за половина процент со најава дека до крајот на годината ќе ја покачи за уште 0,25 отсто.
„Прилично сме сигурни дека наместо за 0,25 отсто Централната банка на Нормашка ќе ја зголеми каматната стапка за 0,5 отсто“, рече Марлен Скјелет Гренруд, економист од Сведбанк, врз основа на податоците за последното движење на цените и пазарот на труд. „Најважен приоритет ќе биде борбата со инфлацијата, која што во јули беше значително над очекувањата. А, кога дополнително на тоа има и невработеност, која што исто така е пониска од очекуваната стапка, тогаш се чини дека е неизбежна корекцијата од 0,50 отсто“, обраложува Гренруд.
Норвешка спаѓа во богатите нации во светот, кои минатата година први почнаа со зголемување на каматните стапки откако состојбата со пандемијата почна да се движи подобро од очекуваното. Меѓутоа, инфлацијата го достигна највисокото ниво во последните 34 години. Дополнителен притисок на цените прави и тоа што невработеноста во оваа држава е само 1,7 проценти.
Економистите сметаат дека Норвешката централна банка во наредниот период не само што ќе внимава на цените на недвижностите, туку ќе обрне големо внимани и на потрошувачката на домаќинствата.
