Британските компании ангажираат надворешни соработници за да ги намалат даноците

Британските бизниси сè почесто се потпираат на самовработени лица во обид да ги ограничат трошоците, додека се обидуваат да се приспособат на зголемувањето на даноците за платен список од 26 милијарди фунти (34,5 милијарди долари) на министерката за финансии Рејчел Ривс.

Бројот на објавени огласи за хонорарни работни места е зголемен за 22 отсто од април, кога стапи во сила даночното зголемување заедно со речиси 7 отсто повисока минимална плата, според податоците на „Адзуна“ (Adzuna) споделени со „Блумберг“. Наспроти тоа, бројот на огласи за постојани работни позиции е намален за 9 отсто.

Наодите покажуваат како реагираат компаниите на одлуката на Лабуристичката партија да ги зголеми социјалните придонеси, пренасочувајќи се од вработување со полно работно време кон ангажирање надворешни соработници, кои извршуваат краткорочни задачи, не добиваат бенефиции како здравствена заштита и, што е најважно, самите ги намируваат даноците и придонесите за национално осигурување.

„Компаниите сега размислуваат ‘овие самовработени се поатрактивна опција, не морам да плаќам придонеси за национално осигурување, можам да заштедам пари’. Од некои слушаме дека тоа им помага полесно да најдат работници“, изјави Џошуа Туви, виш соработник за истражување и политики во ИПСЕ (IPSE), здружение на самовработени.

Според официјалните даночни податоци, компаниите укинале повеќе од 180.000 работни места за вработени откако беше најавено зголемувањето во октомври, а податоците за управување со набавки укажуваат на дополнително намалување минатиот месец. Очекувањата се дека забавувањето на пазарот на труд и стагнацијата на економскиот раст ќе ги натераат носителите на монетарната политика во Банката на Англија (Bank of England) в четврток да ги намалат каматните стапки по петти пат.

Британските работодавци се префрлаат на хонорарци поради зголемувањето на даноците

 

 

Намалувањето на бројот на работници на платен список е најизразено во секторите што се силно изложени на зголемени трошоци за вработување, како што се градежништвото и угостителството. Поголемиот дел од овие сектори исто така се потпира на висока застапеност на самовработени, што укажува дека лесно можат да се префрлат од вработени на платен список на хонорарци за да ги намалат трошоците, без да ја загубат оперативната способност, според анализа на даночните податоци спроведена од „Пантеон Макроекономикс“ (Pantheon Macroeconomics).

„Ако бројот на работни места се намалува затоа што компаниите ја приспособуваат својата работна сила на повисоките трошоци, тогаш не треба едноставно да ги намалувате каматните стапки“, изјави Роб Вуд, главен економист во „Пантеон“.

„Прво, имаме зголемување на даноците што ќе ја поттикне инфлацијата, но, второ, тоа е повеќе еднократна корекција. Откако компаниите ќе ги приспособат своите работни сили на повисоките трошоци, падот на бројот на работни места ќе престане“.

Некои сектори во Обединетото Кралство што кратат работни места може да се префрлат на самовработени

 

Одвоени анкетни податоци од агенцијата за вработување „Хејс“ (Hays)  го потврдуваат свртувањето кон хонорарни ангажмани. Меѓу бизнисите што вработувале персонал, речиси една третина барале хонорарци во февруари, што е зголемување во однос на една четвртина на крајот од летото 2024 година.

Намалувањето на бројот на постојани работни места низ економијата исто така поттикнува сè повеќе работници да преминат на самовработување. Според Том Веј, главен извршен директор на „Хејс“ во Велика Британија и Ирска, лицата што бараат работа обично трагаат по постојано вработување околу четири до шест недели пред да се одлучат да преминат на хонорарна или привремена работа.

„Некое време човек ќе се обидува да најде постојано вработување, но доаѓа момент кога ќе помисли дека мора да премине на хонорарна работа“, изјави Веј.

Во моментов нема коментари за веста. Биди прв да коментира...

Остави коментар