Европскиот пазар на труд покажува изненадувачка стабилност и отпорност, и покрај силниот инфлаторен шок и зголемувањето на каматните стапки во последните години, истакна претседателката на Европската централна банка (ЕЦБ), Кристин Лагард, на годишниот симпозиум на Федералните резерви на САД (Фед) во Џексон Хол.
Според податоците што ги изнесе Лагард, вработеноста во еврозоната пораснала за 4,1% од крајот на 2021 до средината на 2025 година, речиси во склад со економскиот раст и двојно над очекувањата според стандардните економски правила.
„Инфлацијата падна остро, а цената што ја плативме во однос на вработеноста беше изненадувачки ниска“, изјави Лагард. „Разбирањето на изворите на оваа отпорност е клучно за справување со идните шокови.“
Странските работници – клучен дел од економската стабилност
Лагард подвлече дека приливот на странски работници одиграл значајна улога во поттикнување на економијата на еврозоната. Тие помогнале да се компензираат негативните ефекти од намалувањето на работните часови и падот на реалните плати, со што се одржало нивото на вработеност и економската активност.
„Миграцијата доведе до рекорден број жители во Европската Унија, и покрај негативниот природен раст,“ рече Лагард, но предупреди дека политичките ограничувања и јавното незадоволство во некои земји-членки создаваат пречки за натамошен прилив на работна сила.
Комбинација на фактори зад економската издржливост
Дополнително на улогата на миграцијата, Лагард го истакна и олеснувањето на глобалните синџири на снабдување, драстичното намалување на цените на енергијата, како и проактивните фискални политики како фактори што ја поддржале економијата во последните неколку години. Таа посочи и на одложената реакција на платите на инфлацијата, што ѝ овозможило на економијата да се прилагоди без поголеми отпуштања.
Перспективи и неизвесност
И покрај позитивните резултати, Лагард предупреди дека оваа ситуација не треба да се смета за трајна.
„Европскиот пазар на труд излезе од последните шокови во неочекувано добра форма,“ изјави таа. „Но, треба да бидеме внимателни и да не претпоставуваме дека оваа уникатна комбинација на сили ќе продолжи.“
Таа укажа дека демографските предизвици, „задржувањето на работници“ (labor hoarding) и намалувањето на продуктивноста би можеле да станат проблеми, иако автоматизацијата и вештачката интелигенција можат да понудат делумно решение.
ЕЦБ моментално ја задржува основната депозитна каматна стапка на 2%, со сè поголема веројатност дека ќе остане стабилна и наредниот месец. Според проекциите, инфлацијата се очекува да се стабилизира на околу 2% до 2027 година.
.webp){kind=icon}
Во моментов нема коментари за веста. Биди прв да коментира...