По неколкумесечен раст, германските деловни перспективи се влошуваат

Германската деловна доверба неочекувано падна, истакнувајќи ја кршливоста на планот на канцеларот Фридрих Мерц за враќање на растот во најголемата економија во Европа.

По четири месеци раст, индексот на очекувања од институтот „Ифо“ во септември падна на 89,7 од ревидираните 91,4 во август. Аналитичарите анкетирани од „Блумберг“ предвидоа зголемување на 92. Падна и мерачот на моменталните услови.

„Компаниите беа помалку задоволни од моменталното работење, додека нивните очекувања значително се влошија“, изјави денеска претседателот на „Ифо“, Клеменс Фуест. „Изгледите за економско закрепнување претрпеа пад.“

Извештајот е во спротивност со посебна анкета, спроведена и објавена неделава од „Ес енд Пи глобал“ (S&P Global), која покажува дека активноста во приватниот сектор месецов се зголемила. Сепак, некои економисти предупредија дека бројката може да ја прецени силата на закрепнувањето.

Bloomberg Mercury

 

Владата во Берлин се обидува да им стави крај на слабите резултати на Германија по две години намалување на производството. Иако е договорена широка шема за трошење со цел да се зајакне одбраната и да се модернизира инфраструктурата, компаниите повикаа на поголем напредок во други иницијативи, како што е ограничувањето на бирократијата.

ОЕЦД неделава малку ги намали своите прогнози за земјата, предвидувајќи дека бруто-домашниот производ во 2026 година ќе порасне за 1,1 отсто, по растот од 0,3 проценти што се предвидува за 2025 година. Водечките истражувачки институти во Германија утре треба да ја презентираат својата заедничка прогноза.

Со оглед на силната зависност од извозот, производствениот сектор на земјата е особено изложен на протекционизмот на американскиот претседател Доналд Трамп. Повеќето стоки од Европската Унија сега се соочуваат со царина од 15 проценти од другата страна на Атлантикот според договорот постигнат во јули.

Во моментов нема коментари за веста. Биди прв да коментира...

Остави коментар