Северноатлантската алијанса (НАТО) вети „цврст“ одговор на руските упади во нејзиниот воздушен простор и изјави дека ќе ги искористи сите опции, вклучително и воени, за да се одбрани. Веднаш по ваквото соопштение на НАТО и државниот секретар на САД, Марко Рубио, ја потврди американската посветеност кон НАТО. „Ќе работиме со нашите сојузници за да ја браниме секоја педа од територијата на НАТО,“ изјави Рубио во вторникот за Си-би-ес Њуз пред обраќањето на американскиот претседател пред Генералното собрание на ООН. Трамп пак, во својот едночасовен говор ја нападна организацијата и им држеше лекција на останатите светски лидери.
Добро утро, ова се петте вести што се важни за почеток на денот.
Вештачка интелигенција: Ако пукне меурот, ќе има многу изгорени
Големи технолошки компании, кредитори, стартапи – сите се заразени од еуфоријата што ја донесе вештачката интелигенција (ВИ), која допрва треба да ги оправда огромните инвестиции во инфраструктура и развој на нови производи и услуги.
Доколку вештачката интелигенција потфрли и се покаже дека еуфоријата предизвикала пазарен меур, голем број компании нема да преживеат доколку дојде до нагло пукање. На ваква опасност неодамна предупреди технолошкиот ветеран Џек Селби, основач и управувачки партнер на АЗ-ВЦ (AZ-VC), според кого корекција на вреднувањето на ВИ-стартапите е на повидок.
Македонскиот текстилен сектор во очај - машините стивнаа, кошулите останаа недошиени
Во јуни 2015 година вредните раце на текстилните работнички во земјава сошиле 1.961 кошула, во истиот месец годинава биле сошиени близу трипати помалку кошули, само 714. И бројот на работничките се намалил, според податоците со кои располагаат текстилците, за десет години покрај машините има за 50 отсто помалку работници.
Состојбата ескалира последната година, кога клуч на врата ставија десетина конфекции, главно во Источна Македонија. Според претседателката на текстилниот кластер во земјава Маријана Перковска, состојбата допрва ќе се влошува затоа што ниту има работници ниту има работа.
Судот го сопре Трамп – Спасен проект за ветерна електрана вреден 5 милијарди долари
Акциите на данскиот енергетски гигант „Орстед“ (Ørsted) нагло пораснаа откако американски судија даде зелено светло за продолжување на работите на „Револушн винд“ (Revolution Wind), голема ветерна електрана која е веќе 80 проценти завршена и се наоѓа покрај брегот на Роуд Ајленд.
Одлуката беше донесена само еден ден откако компанијата предупреди дека застојот може да предизвика „непоправлива штета“ на проект вреден околу пет милијарди долари.
Приватниот сектор во еврозоната со најбрз раст во последниве 16 месеци
Приватниот сектор во еврозоната се прошири со најбрзо темпо во последниве 16 месеци, откако подобрите резултати во германските услуги ја надоместија слабоста во Франција.
Комбинираниот индекс на менаџери за набавки PMI, кој го составува финансиската куќа „Ес енд Пи глобал“ (S&P Global), се искачи на 51,2 во септември од 51, колку што беше во август, а тоа е над прагот од 50 поени, што означува разлика меѓу раст и пад. Аналитичарите предвидуваа дека бројката ќе остане стабилна.
ОЕЦД: Царините ќе нанесат значителен удар на светската економија во 2026 година
Глобалната економија сè уште е во очекување на значителен удар од трговските мерки на Доналд Трамп, иако во последните месеци покажува поголема отпорност од очекуваното, соопшти ОЕЦД.
Во новите прогнози објавени во вторник, организацијата со седиште во Париз ја зголеми својата прогноза за светскиот раст во 2025 година, како и за повеќето национални економии, наведувајќи го ефектот од предвремено увезување на стоки во очекување на повисоки царини. САД забележаа силни инвестиции во вештачка интелигенција, додека Кина имаше корист од фискална поддршка.
.webp){kind=icon}
