НАТО најавува цврст одговор на руските упади во воздушниот простор

Северноатлантската алијанса (НАТО) вети „цврст“ одговор на руските упади во нејзиниот воздушен простор и изјави дека ќе ги искористи сите опции, вклучително и воени, за да се одбрани.

„Сојузниците ќе ги применат, во согласност со меѓународното право, сите неопходни воени и невоени средства за да се одбраниме и да ги одвратиме сите закани од сите правци“, се вели во соопштението на НАТО испратено по електронска пошта во вторник. „Сојузниците нема да бидат обесхрабрени од овие и други неодговорни постапки на Русија.“

По соопштението на НАТО и државниот секретар на САД, Марко Рубио, ја потврди американската посветеност кон НАТО.

„Ќе работиме со нашите сојузници за да ја браниме секоја педа од територијата на НАТО,“ изјави Рубио во вторникот за Си-би-ес Њуз, додека претседателот Доналд Трамп се подготвуваше да се обрати пред Генералното собрание на Обединетите нации.

Воениот сојуз одржа состанок во вторник на барање на Естонија, откако земјата соопшти дека руски борбени авиони го нарушиле нејзиниот воздушен простор во петокот, во траење од 12 минути. Балтичката држава го нарече упадот дел од пошироката цел на Кремљ да ја тестира решителноста на Европа и НАТО.

Според Естонија, ова е четврто нарушување на нејзиниот воздушен простор од страна на Русија годинава, а трето што е пријавено од членки на НАТО овој месец, по инцидентите во Полска и Романија.

Министерството за одбрана на Русија негираше дека нејзините авиони влегле во естонскиот воздушен простор во петокот, тврдејќи дека леталата следеле планирана рута од Република Карелија, која граничи со Финска, до Калининградската ексклава.

Bloomberg Mercury

НАТО минатата недела соопшти дека се подготвува да ги засили мерките за одвраќање на источниот фронт, откако руски дронови влегоа во полскиот воздушен простор претходно овој месец. Операцијата, наречена „Источен стражар“, ќе вклучува проширено воено присуство, континуирани воздушни патроли и поинтегрирана воздушна и ракетна одбрана.

Балтичките држави повеќепати ги повикаа сојузниците од НАТО да вложат повеќе ресурси во заштита на границите. А почетокот на месецот, трите земји и Полска дури привремено затворија делови од својот воздушен простор долж границата со Русија и нејзината сојузничка држава Белорусија — знак на зголемена загриженост поради активноста на руските дронови.

„Русија нè тестира — ја тестира нашата подготвеност, нашата решителност да возвратиме“, изјави претседателот на Литванија, Гитанас Науседа, на настан на Балтичко-американската трговска комора во Њујорк во понеделникот. „Многу е важно да покажеме солидарност.“

Премиерот на Полска, Доналд Туск, изјави во понеделникот дека неговата земја е подготвена да собори странски летала што ќе влезат на нејзина територија без дозвола. НАТО собори руски дронови што влегоа во полскиот воздушен простор претходно овој месец — прв ваков потег од почетокот на целосната инвазија на Украина од страна на Москва во 2022 година.

„Путин си игра со оган, и следниот пат, ако видиме непосредна закана за нашата територија или за нас, одговорот може да биде поинаков“, изјави министерот за надворешни работи на Естонија, Маргус Цахкна, за ТВ Блумберг во понеделникот.

Текстот е ажуриран со изјавата на америкнскиот државен секретар Марко Рубио.

Во моментов нема коментари за веста. Биди прв да коментира...

Остави коментар