Шпанскиот премиер Педро Санчез планира нов мандат во 2027 година

Шпанскиот премиер Педро Санчез изјави дека ќе се кандидира за реизбор во 2027 година, и покрај анкетите што покажуваат дека неговата Социјалистичка партија тешко би можела да освои мнозинство во парламентот.

„Сигурно ќе го сторам тоа“, рече Санчез во интервју за главниот уредник на „Блумберг“, Џон Миклетвејт.

„Ова е нешто за што веќе разговарав со моето семејство и со мојата партија и, доколку ми овозможат, уверен сум дека можеме повторно да обезбедиме мнозинство“.

Санчез, кој има 53 години, управува со една од најсилните економии во еврозоната, при што се очекува Шпанија годинава да забележи раст од околу 2,7 отсто, повеќе од двојно од просечниот раст на економијата на Унијата. Невработеноста е на најниско ниво од финансиската криза, а „Ес енд Пи глобал рејтингс“ (S&P Global Ratings) неодамна го зголеми кредитниот рејтинг на земјата за една скала.

Шпанските државни обврзници годинава имаат подобри резултати, носејќи поврат од 0,7 отсто во споредба со 0,2 отсто поврат на поширокиот индекс на европските државни обврзници, покажуваат податоците на „Блумберг“.

Шпанскиот раст ќе ја надмине еврозоната во наредните години

Бруто-домашен производ на годишно ниво

 

Bloomberg

„Благодарение на зелените политики, ги намаливме цените на електричната енергија од 2017 година до денес за 50 отсто“, изјави Санчез. „Тоа ни овозможува да ја зголемиме конкурентноста и благодарение на тоа сме сведоци на овој исклучителен економски раст во Шпанија.“

Сепак, Санчез тешко извлекува политички поени, бидејќи се соочува со најподелениот парламент во поновата историја и е опколен со корупциски скандали поврзани со негови поранешни блиски соработници во партијата, како и со членови од неговото семејство.

Анкетите сугерираат дека двете главни опозициски партии, конзервативната Народна партија и крајно десничарската Вокс би победиле на следните избори. Пред тоа, партијата на Санчез ќе се соочи со избори во два региона, меѓу кои и Андалузија, најнаселениот дел на Шпанија, каде што се очекува конзервативците да ја задржат власта.

Санчез е премиер од 2018 година, кога победи на гласањето за недоверба против својот конзервативен претходник Маријано Рахој. Соочен со распарчена политичка сцена, нему му е потребна поддршка од повеќе од осум различни партии за да донесе каков било закон. Владата сè уште функционира со буџетот за 2023 година, кој беше усвоен пред последните општи избори одржани истата година.

Пред две години, на Народната партија и Вокс им недостасуваа четири пратеници за апсолутно мнозинство, а речиси сите анкети предвидуваат дека на следните избори лесно ќе го надминат тој праг. Скандалите во редовите на Социјалистичката партија ја нарушија популарноста на Санчез.

Но Санчез е познат по своите приказни за враќање, особено кога анкетите, а понекогаш и неговата сопствена партија, сметаат дека му е дојден крајот. По изборите во 2023 година, тој ја изгласа амнестијата за каталонските сепаратисти во замена за нивните гласови во парламентот, потег што му обезбеди уште еден мандат.

Сепак, односите на Санчез со каталонските партии се турбулентни и тие периодично ја суспендираат нивната поддршка. Тоа создава тешка политичка средина за шпанскиот премиер, бидејќи неговата влада мора да преговара со Каталонците за секој закон и секое гласање, што ја ограничува моќта за донесување одлуки.

Во моментов нема коментари за веста. Биди прв да коментира...

Остави коментар