Екстремни услови на Пиринејскиот Полуостров, Шпанија и Португалија се борат со големи пожари

Илјадници пожарникари цела ноќ се обидувале да стават под контрола десетиците смртоносни пожари што беснеат низ Шпанија и Португалија, додека високите температури и силните ветрови го разгорувале пламенот низ сува вегетација, шуми и земјоделски култури.

Екстремно опасни услови зафатија речиси цела Шпанија, предизвикувајќи 42 пожари во северозападниот, централниот и јужниот дел на земјата. Илјадници луѓе се евакуирани. Брзата железничка линија меѓу Мадрид и Галиција беше суспендирана, а околу 15 патишта и автопати затворени. Премиерот Педро Санчез во неделата повика на национален пакт за борба против, како што рече, забрзаната климатска вонредна состојба.

Пиринејскиот (Иберискиот) Полуостров викендов беше најтешко погоден од пожарите што избувнаа низ Европа по четири големи топлотни брана летово. Шумски пожари имаше и во Обединетото Кралство и Франција, до Грција, Италија и Турција.

Поради климатските промени, екстремните летни жештини во Европа (континентот што се затоплува најбрзо во светот) стануваат сè почести и поинтензивни.

Жештината почнува да попушта низ поголем дел од полуостровот, но шпанската метеоролошка служба АЕМЕТ (AEMET) соопшти дека невообичаено високите температури ќе продолжат и в понеделник на југот, со црвени аларми по должината на источниот брег, каде што дневните максимални температури може да достигнат 44 Целзиусови степени (111 фаренхајти).

Шпанската војска мобилизира илјадници војници за да помогнат во гаснењето на пожарите, кои досега изгореа најмалку 1.150 квадратни километри (444 квадратни милји), според државниот радиодифузер РТВЕ (RTVE).

„Овие пожари се без преседан во Шпанија“, изјави министерката за одбрана Маргарита Роблес за РТВЕ.

„Мора да прифатиме дека постојат места каде што огнот нема да може да се стави под контрола, освен ако не се смени времето“.

Во северна Португалија, повеќе од 2.000 пожарникари денеска беа распоредени за да се борат со пет активни пожари што гореа во близината на Коимбра и Порто. Еден пожарникар загина, а четворица беа повредени во неделата во сообраќајна несреќа на пат кон пожарот во Фундао, близу границата со Шпанија.

Локалните власти во Ковиља соопштија дека еден пожар е надвор од контрола и брзо се шири на два фронта. Португалската државна метеоролошка служба ИПМА (IPMA) прогласи највисоко ниво на опасност од пожари за повеќе од 80 окрузи, кои опфаќаат речиси половина од земјата. Опасните услови важат и за јужниот туристички регион Алгарве, во екот на летната сезона.

Два противпожарни авиона, испратени од шведската влада, треба да пристигнат во Португалија денеска, соопштија властите.

Пожарите во Шпанија станаа предмет на политички препукувања. Три особено погодени региони, Галиција, Кастиља и Леон и Екстремадура се под контрола на опозициската конзервативна Народна партија, чиј помал коалициски партнер, крајно десничарската Вокс, често го негира постоењето на климатските промени.

Санчез ја повика земјата да ја остави климатската вонредна состојба надвор од политичките борби и најави дека следниот месец ќе претстави предлог за зголемена соработка на сите нивоа на власт за подобрување на подготвеноста на земјата за катастрофи.