Поранешниот директор на ФБИ, Џејмс Коми, обвинет за лажно сведочење

Поранешниот директор на ФБИ, Џејмс Коми, е обвинет за лажно сведочење пред Конгресот и за попречување на правдата во врска со исказ што го дал во 2020 година, со што се забрзува настојувањето на американскиот претседател Доналд Трамп за правни акции против неговите политички противници.

Обвинението им стави крај на неколкудневните шпекулации дали Министерството за правда ќе поведе постапка против Коми, кој со години е во судир со претседателот. Големата порота го објави обвинението во четвртокот преку американска обвинителка што на функцијата ја назначи лично Трамп, откако нејзиниот претходник поднесе оставка под притисок минатата недела.

По стапувањето на функцијата во јануари, Трамп често говори за гонење политички противници и други луѓе што ги смета за непријатели. Тој неодамна на социјалните мрежи даде директна наредба до јавната обвинителка Пам Бонди со барање за итни акции против некои од нив, меѓу кои и Коми.

Трамп ги поздрави обвиненијата на својата мрежа Трут соушл.

„Тој е толку лош за нашата земја, толку долго, и сега конечно започнува да биде одговорен за своите злосторства против нацијата“, напиша Трамп.

По поднесувањето на обвинението, Коми во видео на Инстаграм изјави дека „не се плаши“.

„Јас и моето семејство со години знаеме дека постои цена за тоа што му се спротивставивме на Доналд Трамп, но не можевме да си замислиме да живееме на кој било друг начин“, изјави Коми.

Доколку биде прогласен за виновен, Коми може да се соочи со затворска казна до пет години, соопшти Министерството за правда.

„Џим Коми целосно ги негира обвиненијата што се поднесени денеска“, изјави неговиот адвокат Патрик Фицџералд.

„Очекуваме негово целосно ослободување од обвиненијата во судница.“

Ќерката на поранешниот директор на ФБИ, Морин Коми, во јули беше разрешена од функцијата федерален обвинител во Њујорк. Тогаш таа во порака до колегите изјави: 

„Бев отпуштена по итна постапка преку меморандум од главното министерство за правда, без да биде наведена причина за моето разрешување.“

Коми ја извршуваше функцијата директор на Федералното биро за истраги од 2013 година до неговото разрешување од страна на Трамп во 2017 година. Тој беше разрешен додека ја водеше истрагата што требаше да утврди дали Трамп или лица поврзани со неговата претседателска кампања соработувале со Русија за време на претседателските избори во 2016 година.

По заминувањето на Коми, истрагата за Русија ја презеде специјалниот обвинител Роберт Милер. Таа со години претставуваше товар за Трамп, пред да биде завршена без поднесување обвиненија против него.

Поддржувачите на Трамп се повикаа на сведочење што Коми го дал пред Судскиот комитет на Сенатот во септември 2020 година, тврдејќи дека се заколнал лажно.

Републиканскиот сенатор од Тексас, Тед Круз, на сослушувањето во 2020 година го праша Коми дали некогаш им дозволил на неговите соработници да пуштат информации во јавноста за истрагите против Хилари Клинтон или Доналд Трамп. Коми одговори дека останува на своето претходно сведочење дадено под заклетва – дека никогаш не дал такво одобрение.

Инспекторатот на Министерството за правда подоцна, во извештај од февруари 2018 година, заклучи исто: дека Коми не овластил протекување информации.

Обвинението против Коми ќе го води Линдзи Халиган, која во понеделникот беше назначена од Трамп за вршителка на должноста јавен обвинител на Источниот округ на Вирџинија. Таа претходно служела како висока советничка во Белата куќа и имала задача да ги прегледува експонатите во музеите на „Смитсонијан“ како дел од иницијативата на претседателот за „враќање на вистината и разумот во американската историја“.

Според Халиган, обвиненијата во овој случај претставуваат сериозно нарушување на јавната доверба. 

Во моментов нема коментари за веста. Биди прв да коментира...

Остави коментар