Инфлацијата во еврозоната се намали на близу два отсто

Инфлацијата во еврозоната малку се намали, но остана над два отсто, што оди во прилог на одлуката на Европската централна банка (ЕЦБ) да ги задржи трошоците за позајмување таму каде што се.

Потрошувачките цени во октомври се зголемија за 2,1 отсто во однос на истиот месец лани, што е намалување од 2,2 проценти, колку што изнесуваше растот на цените во септември. Тоа се совпадна со средната процена во анкетата на „Блумберг“. Базичната инфлација, која ги исклучува нестабилните компоненти, неочекувано се задржа на 2,4 проценти.

Bloomberg Mercury

 

Оваа објава на податоците доаѓа на еден ден откако ЕЦБ ги задржа каматните стапки на два отсто во својот трет состанок по ред, оценувајќи дека поставките на политиката се соодветни за на среден рок да се одржат ценовните зголемувања околу нивната цел. Претседателката Кристин Лагард вчера изјави дека процената на изгледите за инфлација е генерално непроменета, иако останува понеизвесна од вообичаеното.

Националните извештаи неделава покажаа дека ценовните притисоци  во Шпанија се зголемуваат, во Германија се намалуваат помалку од очекуваното, а во Франција и Италија остануваат далеку под целта.

ЕЦБ сè уште очекува пад под два отсто во следната година, па повторно забрзување до блиску до целта во 2027 година. Новите квартални прогнози во декември првпат ќе ја вклучат и 2028 година, што потенцијално ќе ги разгори дискусиите за тоа дали е потребно понатамошно монетарно олабавување.

Засега, официјалните лица сигнализираат малку причини за дејствување. Лагард повтори дека „од гледна точка на монетарната политика, ние сме на добра позиција“.

Податоците за економскиот раст во последните денови го поддржуваат тој став. Производството во еврозоната во третиот квартал се зголеми за 0,2 отсто, повеќе отколку што предвидуваа аналитичарите, што претставува знак на отпорност на трговските нарушувања што ги предизвика американскиот претседател Доналд Трамп.

Економијата беше поттикната особено од Франција, каде што компаниите и домаќинствата се спротивставија на политичките превирања околу државниот буџет. Германија и Италија стагнираа, тесно избегнувајќи рецесии.

ЕЦБ предупреди дека посилното евро и последиците од царините сè уште би можеле да ја намалат инфлацијата повеќе од очекуваното. Од друга страна, цените може да се зголемат ако трговските нарушувања предизвикаат застои во синџирите на снабдување.

Документ на ЕЦБ во кој се сумираат нејзините неодамнешни контакти со компаниите покажа дека некои производители гледаат надолен притисок врз цените, и тоа делумно затоа што американските царини доведуваат до тоа повеќе стоки од други места да се пренасочат кон валутниот блок. Влијанието врз активноста исто така беше оценето како негативно.

Во пресрет на вчерашниот состанок, креаторите на политиките понудија различни процени за ваквите сценарија. Додека едни ги нагласуваат ризиците што би можеле да ја намалат инфлацијата, други ги истакнуваат моментите што ја движат во спротивна насока.