.webp){kind=icon}
Во Брисел денеска се одржува состанок на европските министри за енергетика кои се под притисок брзо да договорат мерки со цел да се спречи енергетската криза да предизвика финансиски колапс.
Коментарите на белгискиот премиер, Александар Де Кро, во четвртокот го ставија центарот на вниманието на проблемот, бидејќи тој предупреди дека Европа се соочува со „деиндустријализација и сериозен ризик од фундаментални социјални немири“ поради енергетската криза.
Цените на гасот, кои се за околу осум пати повисоки од нивните просечни нивоа за овој период од годината, беа нестабилни оваа недела. По запирањето на „Северен тек“, цената на гасот во понеделникот досегна рекордни нивоа, па во текот на неделата се спушти на околу 200 евра по мегават час, по најавата на ЕУ дека може да ја ограничи цената на рускиот гас.
Клучни случувања:
- Предупредувањата за енергетска криза во ЕУ се влошуваат, се нагласува потребата од итна интервенција
- Германија не поддржува ограничување на цената на рускиот гас бидејќи некои земји сè уште зависат од него
- Целта на Лиз Трас да го направи Обединетото Кралство нето извозник на енергија означува голем пресврт
Изостана германска поддршка за ограничување на цената на гасот
Германија не поддржува ограничување на цената на рускиот гас бидејќи некои земји сè уште зависат од тие испораки, изјави министерот за економија Роберт Хабек за новинарите во Брисел. „Овие земји сè уште имаат зависност што ги принудува да го користат гасот“, посочи тој. „Значи, би било несоодветно да се каже дека Германија секогаш повикува на разбирање, а другите држави да не го добиваат истото“, посочи Хабек.
Германија, исто така, е против општо ограничување на цените на гасот бидејќи тоа би испратило погрешен сигнал до пазарот, објасни германскиот министер. Хабек поддржува „ограничување на цената на основните енергетски потреби“, но потрошувачите ќе треба да платат повеќе кога нивната употреба ќе се искачи над одреден износ.
Австрија, која сè уште зависи од испораките на гас од Москва, иако зависноста е намалена, исто така не поддржува ограничување на цените, рече министерката за енергетика Леоноре Гевеслер.
