Најдоцна до среда за кога е закажана седница на владиниот Економски совет да се донесат мерки за ублажување на ударот кој високата цена на електричната енергија им го предизвика на компаниите, бара Стопанската комора на Северна Македонија (СКСМ). Тврдат дека ситуацијата е сериозна, а сите компании плаќаат за шест пати повисоки сметки за струја. Во прилог на тврдењата од комората акцентираат резултат од анкета на над 1.600 домашни компании кои купуваат струја на слободниот пазар кој биле прашани за мислење на 30 септември. Анкетата покажала дека компаниите се наоѓаат во исклучително тешка состојба. Изјавиле дека почнале да го намалуваат бројот на вработени, да го редуцираат производството, дел одлучиле и да ги затворат капацитетите.
„Ескалацијата ќе биде во наредните два месеци кога се склучуваат договорите за снабдување со струја за наредната година. Оставени сами на себе да се снаоѓаат како знаат и умеат, фирмите излез бараат во враќањето на регулираниот пазар. Комората регистрира случаи на правно преструктуирање (делење на фирмите за да се исполнат условите за влегување на регулираниот пазар), што може да доведе до сериозни последици за сиот енергетски систем, исто како и за отпуштените работници, кои, иако дома имаат субвенционирана цена на струјата, нема да можат да ја платат, велат од Стопанската комора.
Оттаму укажуваат дека без државна поддршка 10-те најголеми потрошувачи на електрична енергија, кои имаат 6.000 вработени, приход од 1 милијарда евра, наредната година, според овие цени, би требало да платат половина милијарда евра, со што ќе се наруши нивната конкурентност и ќе се удри врз темелите на македонската економија.
„За другите компании на слободниот пазар Комората сугерира, врз основа на сите компаративни анализи, да добијат определена базна цена над која државата би ги покривала трошоците и со тоа би се создале неопходните претпоставки за некаква предвидливост, која е основа на бизнисот.
Барањата се оправдани и економски издржани за да се зачува ценовната конкурентност на македонските производи, во услови кога за мегават час Србија има цена од околу 100 евра, Босна и Херцеговина – 65 евра, Косово – 70 евра, Бугарија има поставена лимит-цена од 128 евра, износ над кој трошокот го покрива државата, Романија има цена од околу 180 евра, а Грција прогнозира максимално ниво на цена од 220 евра за мегават час, со субвенционирање на другиот дел од реалната вредност на цената на струјата, велат од Комората.
Додаваат и дека ова апсолутно не е момент за каков било дополнителен фискален товар за бизнис-секторот во однос на државата, без оглед на тоа дали станува збор за промена на постојните даноци, воведување нови даноци или за укинување на даночни ослободувања и слично.
.webp){kind=icon}
