Од Австрија до Девствените Острови: Од каде дојдоа над осум милијарди евра инвестиции во Македонија?

Состојбата на директни инвестиции во Македонија на крајот на минатата година изнесувала 8,8 милијарди евра (или 52,2 проценти од проценетиот податок за БДП), од кои 6,2 милијарди евра се вложувања во сопственички капитал, додека 2,6 милијарди евра се вложувања во должнички инструменти, покажуваат податоците на Народната банка. 

Австрија, Германија и Турција најголеми инвеститори

Анализирано по земји, највисоки директни инвестиции, во вредност од 1,41 милијарди евра се регистрирани од Австрија, по што следуваат Германија и Турција, со директни инвестиции во вредност од 1,03 милијарди евра и 919 милиони евра, соодветно.

Во групата на петте најголеми странски инвеститори во земјава спаѓаат и Грција (со 859 милиони евра) и Холандија (со 769 милиони евра). На овие пет земји отпаѓаат 56,5 проценти од вкупните директни инвестиции. 

Производството, финансиите и осигурувањето најпривлечни дејности

 

Кога станува збор за дејностите на инвестирање, од вкупните директни инвестиции, 2,7 милијарди евра, или 30,9 проценти се инвестирани во дејноста „производство“,  додека 2,1 милијарди евра, или 23,8 проценти во дејноста „финансиски и осигурителни активности“.

Словенија најголем инвеститор од регионот

Податоците на Народната банка откриваат дека од земјите од регионот Адрија, највисоки инвестиции има од Словенија (676 милиони евра), а потоа следуваат Србија со 186 милиони евра и Хрватска со 126 милиони евра. Најмалку инвестиции во земјава има од Босна и Херцеговина (34 милиони евра).  

Егзотични острови на листата инвеститори

Забележително е дека во изминативе години на листата странски инвеститори во Македонија често се појавуваа и езотични острови кои важат за даночни раеви.

Заклучно со минатата година според состојбата на директни инвестиции во Македонија на врвот на листата на „егзотични инвеститори“ се Британските девствени Острови (131,7 милиони евра), а потоа следуваат Бахамите (40,18 милиони евра).