.webp){kind=icon}
Во април, вкупните депозити забележаа пад од 0,3 отсто на месечна основа, којшто во целост се должи на намалувањето на депозитите на корпоративниот сектор, соопшти Народната банка.
На годишна основа, вкупните депозити бележат раст од 3,6 отсто, во поголем дел заради зголемените депозити на секторот „домаќинства“.
Вкупните кредити во април се зголемени за 0,9 отсто на месечно ниво, при годишен раст од 10 отсто.
„Растот по двете основи е резултат на зголемувањето на кредитите кај двата сектора, којшто е поизразен кај корпоративниот сектор“, информираат од Народната банка.
Оттаму додаваат дека во април 2022 година, кај вкупните депозити на корпоративниот сектор е забележан месечен пад од 3,1 отсто.
„Притоа, надолната промена пред сѐ произлегува од падот на депозитните пари, при пад и на долгорочните депозити во странска валута и во денари, а во услови на раст на краткорочните депозити во странска валута и во денари. На годишна основа, растот изнесува 1,7 отсто и произлегува од повисоките краткорочни депозити во странска валута и депозитните пари, при пад кај останатите компоненти.“, објаснуваат од Народната банка.
Истовремено, кредитите на корпоративниот сектор се зголемени за 1,1 отсто и 12,3 отсто на месечно и годишно ниво, соодветно. Притоа, нагорната месечна и годишна промена се должи на растот на кредитите во денари и во странска валута, којшто е поизразен кај кредитите во денари.
Kај вкупните депозити на домаќинствата, во април е забележан раст од 0,9 отсто на месечна основа.
„Нагорната промена е резултат на зголемените депозитни пари, како и краткорочните и долгорочните депозити во странска валута, додека долгорочните и краткорочните депозити во денари се намалени. Анализирано на годишна основа, овие депозити се повисоки за 4,6 отсто, главно под влијание на растот на краткорочните депозити во странска валута, при забележан помал раст и кај долгорочните депозити во странска валута и депозитните пари, а во услови на пад кај долгорочните и краткорочните депозити во денари“, соопшти Народната банка.
Во април, вкупните кредити на домаќинствата се зголемени за 0,5 отсто на месечно ниво, како резултат на речиси подеднаков раст на кредитите во денари и во странска валута. На годишно ниво е забележан раст од 7,8 отсто, којшто во поголем дел се должи на кредитите одобрени во денари.
Анализирано според намената на кредитите одобрени на физичките лица, потрошувачките и станбените кредити, како најзастапени категории, бележат месечен раст од 0,5 отсто и 1 отсто соодветно, при годишен раст од 6,6 отсто и 15,4 отсто, соодветно.
„Кај автомобилските кредити и кредитите одобрени на кредитни картички, овој месец, е остварен раст од 2,3 отсто и 0,2 отсто на месечна основа, соодветно, додека на годишна основа се намалени за 10 и 2,8 отсто, соодветно. Негативните салда на тековните сметки, во април, се намалени за 1,5 оттсо на месечно ниво, додека на годишно ниво бележат раст за 4,1 отсто. Кај кредитите одобрени врз други основи е забележан месечен и годишен пад од 2,4 отсто и 34 оттсо, соодветно.“, информираат од Народната банка.
