.webp){kind=icon}
Туризмот се враќа во нормала по паднемијата. Според податоците од Државниот завод за статистика, за осум месеци бројот на туристи се покачил за 35,1 отсто во споредба со истиот период лани, додека реализирани се за 20,1 отсто повеќе ноќевања. Годинава во периодот од јануари до август Македонија угостила вкупно 677.843 туристи, од кои 328.653 домашни, а 349.190 странски.
Но, се чини дека за растот се заслужни странските туристи, кои се враќаат во земјава по големиот пад во времето на пандемијата. Нивната бројка годинава е речиси удвоена, односно зголемена е за 87,8 проценти, за разлика од скромниот раст на бројот на домашните туристи од само 4 отсто.
Статистиката покажува дека бројот на туристи во Македонија конкретно во месец август споредено со истиот месец лани се зголемил за 3,7 отсто, додека бројот на реализирани ноќевања пораснал за 1,8 проценти. Но, мора да се забележи дека домашните туристи во август не биле многу расположени за шетање во Македонија, за разлика од странските. Во август годинава македонските туристички места угостиле за 10 проценти помалку домашни туристи, односно 116.182, но за 35,5 отсто повеќе странци споредено со истиот месец лани, или 74,673 туристи.
Прочитај повеќе
Девизниот прилив од туризмот за 20 отсто поголем од 2019
Македонскиот туризам може да ја заокружи годинава со повеќе од 400 милиони долари и реализирани над 2,6 милиони ноќевања
18.09.2022
Најпосетени во август биле езерските места, регистрира Сржавниот завод за статистика, каде што домашните гости се многу поприсутни од странските, односно од вкупно скоро 130.000 туристи во езерските места, три четвртини се домашни, а остатокот странски туристи. Скопје е далеку подолу по бројот на туристи и во август го посетиле 36.442 гости, од кои најголем дел странци, односно 32.701.
Од вкупно 74.693 туристи од странство кои ја посетиле земјава во август, најбројни се Турците (14,8 отсто), следуваат Србите (9,8 отсто), потоа Полјаците (7,5 проценти), Холанѓаните (6,8 отсто), Романците (6,5 проценти) и Германците (5,8 отсто). Од нив, најдолго се задржувале Холанѓаните, во просек по 4,6 дена, а по нив се Полјаците со просечен престој од 3,8 дена.
