Државниот пазарен инспекторат (ДПИ) континуирано се бори со сивата економија и нелегалната трговија, особено присутна во онлајн продажбата. За полесно утврдување на нерегистрираните трговци ДПИ соработува и со други институции, особено со Министерството за внатрешни работи и Агенцијата за пошти, вели директорката на ДПИ, Анета Симеска Димоска, во разговор за Блумберг Адриа ТВ.
„Во последниот период се зголемува свеста на купувачите и се' помал е бројот на потрошувачи кои доставуваат пријави дека купиле нешто од нерегистриран трговец. Не е дека не постојат, туку соработуваме со институциите за да ги откриеме и утврдиме сите кои вршат нелегална трговија, вели Анета Симеска Димоска, директорка на Државниот пазарен инспекторат.
Не се мали забелешките од бизнис секторот за нелојална конкуренција, особено во време на силни неколку последователни кризи. Компаниите очекуваат од Пазарниот инспекторат редовно да спроведува акции за сузбивање на сивата економија, а не само по пријави.
„И други институции имаат надлежност да ги детектираат овие појави и заедно постапуваме. ДПИ покрај редовните надзори врши и вонредни инспекциски надзори по проценка на ризик за тоа каде и кога да постапуваме“, вели директорката на Пазарниот инспекторат, која напоменува дека не е зголемен бројот на пријави на нерегистрирани вршители на дејност.
„Не можам да кажам дека е зголемен бројот на пријавени нерегистрирани лица. Во последната година имаме извршено околу 200 инспекциски надвози по пријави од граѓани, од правни лица или Управата за јавни приходи, каде што имаме утврдено појава на нерегистрирани вршители на дејност и каде се изречени казни согласно Законот за вршење нерегистрирана дејност“, вели Симеска Димоска.
Во видеото од разговорот за Блумберг Адриа ТВ, директорката на Пазарниот инспекторат зборува и за кадровските проблеми на институцијата, за дообука на постојните, вработување на нови кадри и прераспределба на вработени од други институции за потребите на инспекторатот.
.webp){kind=icon}
