Гувернерката за „Блумберг Адрија“: Веројатно каматите ќе растат уште

Има веројатност Европската централна банка (ЕЦБ) и во следниот период да продолжи со зголемувањето на каматите, но и веројатност за постепено намалување на билансот на ЕЦБ од декември, вели ексклузивно за „Блумберг Адрија“, гувернерката Анита Ангеловска Бежоска. Во коментарот веднаш по одлуката на ЕЦБ за повторно зголемување на каматната стапка од 0,75 процентни поени Ангеловска Бежоска вели дека затегнувањето треба да делува на побарувачката во европската економија, а преку тоа и на инфлацијата.

„Се разбира дека ваквата политика на ЕЦБ, а особено кога и тие јасно ги комуницираат надолните ризици за растот е мотивирана од инфлацијата, којашто забрзува и во еврозоната и во септември достигна речиси 10 отсто. Со затегнувањето на финансиските услови преку раст на каматата, но и преку другите инструменти на ЕЦБ, за очекување е да се делува на побарувачката во европската економија, а преку тоа и на инфлацијата, барем во оној дел којшто е почувствителен на промените на побарувачката. Ова го нагласувам, бидејќи со каматите не може да се делува на цените на храната и енергенсите, коишто тековно се под силно влијание на геополитички, а не на економски фактори, вели Ангеловска Бежоска за „Блумберг Адрија“.

Гувернерката е категорична дека идните потези на централните банки ќе зависат од податоците кои внимателно се следат. Затоа, вели дека е тешко да се каже дали зголемувањето на каматите ќе забави, или ќе продолжи со ова темпо.

Народната банка во неколку наврати ја зголеми годинава основната каматна стапка и ја доведе до ниво од 3,5 проценти.

Во моментов се работело на есенските проекции и како што вели гувернерката во ноември повторно ќе се реоценува поставеноста на монетарната политика.

„Со оглед на тоа што нашата валута е врзана со еврото, монетарната реакција кај нас во еден дел зависи од чекорите на ЕЦБ, но и од домашни специфични фактори. Ние започнавме да ја зголемуваме каматната стапка, пред тоа да почне да го прави ЕЦБ и зголемувањето го направивме во неколку наврати. Покрај со каматната стапка реагиравме и со други инструменти уште минатата година. Тековно, ги анализираме сите расположливи информации и податоци, работиме на сеопфатните есенски проекции, и кон средината на ноември повторно ќе ја реоцениме нашата поставеност, вели гувернерката за „Блумберг Адрија“.

Европската централна банка вчера по втор пат годинава ги зголеми каматите за 75 базични поени потег кој во целост беше во согласност со очекувањата на аналитичарите и на пазарот.

Каматата на депозитите ќе изнесува 1,5 отсто, каматата на главните операции за рефинансирање е два отсто, а на кредитите преку ноќ 2,25 отсто. Така, клучната стапка се искачи на два отсто по повеќе од една деценија (за првпат од 2009 година), кога ЕЦБ реагираше на негативните последици од светската економска криза.

„Економската активност во еврозоната веројатно значително ќе забави во третиот квартал“, рече претседателката na ЕЦБ, Кристин Лагард на прес-конференцијата. „Очекуваме дополнително слабеење во остатокот од годинава и почетокот на следната година“, додаде таа.

Минатиот пат, кога каматната стапка беше два отсто, невработеноста во еврозоната беше за два процентни поена повисока од денешната. На крајот на 2008 година, бројот на невработени во еврозоната изнесуваше 8,6 отсто, додека овој удел сега е помал и изнесува 6,6 отсто. Тоа би требало да значи дека ЕЦБ е во малку полесна ситуација од тогаш.

„Инфлацијата останува премногу висока и ќе остане над целта подолг период“, се вели во соопштението на ЕЦБ.

 

Во моментов нема коментари за веста. Биди прв да коментира...

Остави коментар