Каматите ќе продолжат да растат во обид да се скроти инфлацијата, но некои од експертите се загрижени за тоа како ќе се вратиме во првобитната состојба. Универзитетскиот професор Абил Бауш смета дека централната банка е единствената институција чии мерки за справување со инфлацијата се соодветни.
„За жал, и натаму ќе растат каматите. Единствената институција што со своите инструменти се обидува да ја заузди инфлацијата е централната банка. Другите влијателни институции понудија само краткорочни мерки што имаат негативен ефект, особено некои од мерките, како замрзнати маржи или цени, кои сега ни се вратија како бумеранг“, вели професорот Бауш во разговор за Блумберг Адрија ТВ.
Универзитетскиот професор смета дека проекцијата на централната банка за економски раст и инфлација во 2023 година е многу пореална, отколку владините проекции.
„Проекцијата на централната банка е пореална и пооптимистичка и кога ќе ја споредите со проекциите на власта, некако не се совпаѓаат бројките, затоа што има инфлација од седум проценти, а од друга страна има економски раст од три отсто, за кои не знам ни како ја проектирале ни како ќе ја достигнат таа стапка од три проценти економски раст во услови кога веќе проектирале некоја инфлација од седум проценти“, вели Бауш, потенцирајќи дека сомнежот е уште поголем, особено ако се знае дека инфлацијата до крајот на годината не може да достигне некаква стабилизација од околу 12 или 13 проценти.
Според неговото мислење, се наоѓаме во период кога е достигнат врвот на инфлацијата и сега надлежните се обидуваат да ја стабилизираат.
Погледнете го целиот разговор од гостувањето на универзитетскиот професор Абил Бауш во Блумберг Адрија ТВ.
.webp){kind=icon}
