.webp){kind=icon}
Инфлацијата во земјава веќе го достигна врвот и почнува да забавува. Барем така покажуваат податоците на Државниот завод за статистика за ноември. По рекордните 19,8 отсто од октомври, минатиот месец трошоците на живот изнесувале 19,5 отсто.
И во ноември, исто како и во претходните месеци, најголем придонес за високата инфлација имаат цените на храната, но индексот прв пат по подолго време падна под 30. Раст на цените има и на месечно ниво, но забавен во споредба со претходно.
Од основните прехранбени производи, во ноември раст на цената има само кај месото.
Континуираниот раст на цената на лебот кој почна лани во септември, за прв пат во ноември бележи пад.
Прв пат по февруари годинава, минатиот месец има благ пад и кај цената на млекото, производ кој во претходните два месеци имаше забрзан раст.
Цената на маслото почна да паѓа во јули годинава, а во номеври се врати на нивото од април кога овој производ во земјава стана дефицитарен.
Власта очекува дека намалувањето на цените кај основните прехранбени производи ќе биде позабележително од овој месец затоа што е обезбедна поевтина струја за овие компании. Наместо по берзански цени каде струјата деновиве се тргува и за 400 евра за мегават час, тие сега енергентот го плаќаат по 85 евра.
