.webp){kind=icon}
Американската министерка за финансии Џенет Јелен рече дека нејзините минатогодишни проценки за инфлацијата биле погрешни.
„Мислам дека тогаш згрешив за начинот на кој ќе оди инфлацијата“, рече Џенет Јелен во интервју за Си-Ен-Ен на прашањето дали ја потценила заканата од инфлацијата во нејзините изјави минатата година.
Таа изјави дека „имаше непредвидени и големи потреси во економијата кои предизвикаа зголемување на цената на енергијата, храната и тесните грла во снабдувањето, што лошо се одрази на нашата економија, а што јас тогаш не ги разбирав целосно“.
„Ударите врз економијата продолжуваат, а инфлацијата е главната грижа на претседателот Џо Бајден. Тој силно верува и ја поддржува независноста на Федералните резерви во преземањето на сите неопходни чекори за намалување на инфлацијата“, рече Јелен.
Таа посочи дека администрацијата на Бајден презема мерки за поддршка на напорите на ФЕД за ограничување на инфлацијата, споменувајќи го во контекст на барањето на владата да ги намали цените на лековите на рецепт, поевтина здравствена заштита и предлог-законот во Конгресот за зголемување на употребата на обновливи извори на енергија, што би требало да резултира со пад на цените на фосилните горива.
Иако рече дека неодамнешните податоци за падот на базичната инфлација во САД се охрабрувачки, Јелен посочи дека цената на нафтата се уште е висока, дека Европа работи на забрана на увозот на руска нафта и заклучи дека „понатамошни шокови во економијата не може да се исклучат“.
