.webp){kind=icon}
Компаниите бараат на шест месеци да се одложи примената на Законот за заштита на потрошувачите. Своето барање тие преку писмо го испорачаа до Министерот за економија, Крешник Бектеши.
„Блумберг Адрија“ дојде до писмото кое Стопанската Комора на Македонија во име на компании од трговијата, прехранбената индустрија, информатичко – комуникациските технологии и тн го испрати до Министерсвото за економија.
Во него стои дека новиот Закон покренал голем број реакции „поврзани со усогласувањето на деловното работење со одредбите од Законот“.
„Компаниите ја препознаваат важноста на потрошувачкото право и преземаат напори за усогласување на работењето со одредбите од овој Закон, меѓутоа укажуваат дека е потребно да се остави рок од минимум шест месеци од денот на неговото влегување во сила за целосно да го усогласат своето работење, а во тој период да се делува исклучиво едукативно од страна на инспекциските органи и да се организираат секторски средби меѓу претставниците на компаниите ресорното министерство и надлежните инспекциски служби со цел деловните субјекти да се подготват за негова доследна примена“, стои во писмотто до Бектеши.
Зошто се бара одложување на примената на Законот?
Комората наведува повеќе причини за барањето за одлагање на примената на законот за половина година.
Првата е комплексноста на законот „кој воведува високи стандарди за заштита на правата на потрошувачите, а отвора голем број прашања околу примената на одредбите и нивното толкување од страна на институциите“.
Втората прична е тоа што целосното усогласување со законот е вистински предизвик за компаниите затоа што се случува во време на тешка криза.
„Примената на законот бара голем ангажман имајќи ги предвид обврските кои произлегуваат од истиот како и дополнителните финансиски, технички и човечки ресурси кои е тешко да се обезбедат во услови на криза“, е третата причина наведена во писмото до министерот за економија.
Последната причина се ригорозните казни предвидени со законот, а кои стигнуват и до 10.000 евра.
„Тие можат да го доведат во прашање деловното работење на некои компании поради што се наметнува потребата инспекцискиот надзор извесно време да има исклучиво едукативна функција и да не изрекува глоби“.
Што превидува Законот?
Новиот Закон за заштита на потрошувачите со член 37 предвидува сите производители во земјава своите продукти да ги декларираат и на Македонски и на Албански јазик. Со оваа одредба се бара двојазичност кај сите документи: декларациите, сертификатите, гарантните листови, упатствата за склопување и користење на производот....
Освен оваа новина, Законот превидува и временско ограничување на сезонските попусти во продавниците. Сезонско намалување ќе може да има само двапати во годината, на крајот на летната и на крајот на зимската сезона, и тоа во строго одредени денови, меѓу 25 август и 25 септември, како и меѓу 25 декември и 25 јануари.
Трговците ќе може да продаваат по намалени цени и во преостанатиот период од годината, но тогаш ќе станува збор за сосема друг тип на попуст, на пример акциски или промотивен, но нема да може да биде сезонска распродажба.
Новиот Закон почна да важи од 15 ноември, а беше најавен во јули годинава.
