.webp){kind=icon}
Арбитражниот суд во Париз пресуди дека Македонија треба да плати отштета од околу 21,5 милиони евра на грчката ЕЛ.ПЕТ Балканики за непочитување на обврските од купопродажниот договор за рафинеријата ОКТА од 1999 година.
Виктор Андонов, советник за енергетика во Кабинетот на премиерот Димитар Ковачевски денеска на прес-конференција рече дека адвокатскиот тим од Франција, што го има ангажирано Владата ја разгледува пресудата и дека по завршување на тој процес ќе бидат познати следните чекори што ќе се преземат.
„Адвокаткиот тим на Дехерт, кој е ангажиран од Владата ја разгледува и ја анализира пресудата. По завршување на тој процес, заедно со Координативното тело кое е задолжено за арбитражните постапки, ќе и предложат на Владата соодветни чекори што ќе се презмат во однос на објавувањето на пресудата“, рече Андонов.
Со донесената пресуда, како што посочи тој, преполовен е износот на оштета што го барала грчката компанија.
„Вкупното оштетно побарување заедно со каматите за периодот 2008-2011 година изнесуваат 42 милиони и 646 илјади евра. Согласно пресудата, оштетното побарување кое е пресудено од страна на Арбитражниот суд во Париз е за 50 проценти пониско од првичното барање, односно оштетното побарување пресудено од Судот изнесува 21 милион 478 илјади 799 евра, што значи дека нашиот адвокатски тим се изборил за преполовување на бараниот износ“, рече Андонов.
Од Кабинетот на вицепремиерот за економски прашања Фатмир Битиќи информираа дека со пресудата е утврдено дека „ЕЛ.ПЕТ“ нема право да бара пенали за периодот додека ОКТА не работела од 2012 до 2019 година, односно дека ова се последните пенали кои државата ги плаќа по основ на договорот од 1999 година.
„ЕЛ.ПЕТ побаруваше главен долг од 31.590.000 американски долари по основ на непотрошен мазут на ОКТА од гарантираната годишна количина од 500.000 тони за годините 2008, 2009, 2010 и 2011 година. Исто така, побаруваше 5 отсто годишна затезна камата сметано од 22.12.2015 година, што во апсолутен износ изнесува околу 11.056.000 долари до 22.12.2022 година, како и адвокатски трошоци и трошоци на арбитражната постапка во износ од 1.439.920 евра. Вкупното побарување на ЕЛ.ПЕТ Балканики по основ на главен долг и камата изнесува 42.646.000 долари“, соопшти Кабинетот на Битиќи.
Оттаму прецизираат дека Арбитражниот суд досуди 21.478.797,00 долари за главниот долг од побаруваните 31.590.000 долари, како и затезна камата по ЕУРИБОР стапката која е негативна во претходниот период, наместо побаруваните 11.056.000 долари.
„Со тоа вкупно досудениот износ по основ на главното побарување до денес е околу 21.478.797 долари, што претставува околу 51 отсто од побаруваниот износ со тужбата (42.646.000,00 долари). На ЕЛ.ПЕТ му се досудени и 787.334 евра за адвокатски и арбитражни трошоци од побаруваните 1.439.920 евра. Со пресудата е утврдено дека вкупната количина на потрошен мазут на ОКТА во период 2008-2011 година изнесува 1.204.489 тони, така што на ЕЛ.ПЕТ му следат пенали од 27 УСД по тон за 795.511 тони мазут“, прецизираат од Кабинетот на Битиќи.
