Собранието попладнево, со 56 гласа „за“, 30 „воздржани“ и еден „против“ го усвои буџетот за 2023 година.
Според министерот за финансии Фатмир Бесими, дебатата дала резултати и пред гласањето за буџетот биле прифатени неколку амандмани.
Според Бесими, буџетот е реален и развоен, заснован на златното правило во јавните финансии, капиталните расходи да се повисоки од буџетскиот дефицит.
Оцената на опозицијата, пак, која најави дека ќе гласа воздржано, е дека буџетот е преобемен и инфлаторен и оти со него ќе се зголемат дефицитот и јавниот долг.
За дополнетиот буџет се расправаше пет дена на пленарна седница. Дополнетиот буџет беше доставен во Собранието откако Владата ги вгради прифатените амандмани од расправата во собраниската комисија за финансирање и буџет.
Влада на РСМ
Во буџетот за 2023 година, растот е проектиран на 2,9 отсто, а инфлацијата на 7,1 отсто. Вкупните приходи се планирани на ниво од 282 милијарди денари и се повисоки за 14,8 проценти во однос на 2022 година, а расходите на ниво од 324,8 милијарди денари, или се за 12,6 проценти повисоки во однос на 2022 година. Буџетскиот дефицит е на ниво од 4,6 проценти од планираниот БДП. За капитални расходи се планирани 48,9 милијарди денари, или за околу 52,3 отсто повеќе во однос на планот за 2022 година.
Во буџетот се предвидени околу 250 милиони евра за надминување на предизвиците од глобалната енергетска и економска криза, како и средства за редовна исплата на платите и пензиите и за поддршка на фирмите и земјоделците.
Според Владата, буџетот е насочен кон ублажување на последиците од енергетската криза и кон непречено финансирање на евроинтеграциите и со него се поставува основата за економско заздравување, забрзување на економскиот раст и за постепена фискална консолидација.
.webp){kind=icon}
