Потпретседателот на Сојузот на стопански комори (ССК) за надворешни односи и претседател на Туристичко-угостителската комора, Аркан Керим, реализира посета на познатиот вински регион Болен, јужна Франција, како гостин на винарницата „Шато де Гурдон“, чиј сопственик е македонската винарница „Тиквеш“.
Директорот на „Тиквеш“, Светозар Јаневски, и Керим остварија повеќе значајни средба, меѓу кои и со градоначалникот на Болен, Антони Зилио, заменикот на градоначалникот, Андре Вигли, и претседателот на Унијата на претприемачи на Болен, Жан Мишел Луи.
Керим истакна дека Франција е наш важен економски партнер, како и политички поддржувач на патот на нашата земја кон членството во ЕУ, потенцирајќи дека овие добри релации треба да се искористат за унапредување на соработката во секторот на винската индустрија.
„Инвестицијата на ’Тиквеш’ во француската винарница ’Шато де Гурдон’ е добар пример на градење мостови меѓу компаниите од овој сектор од двете земји, кои им го отвораат патот на македонските винарници кон пазарот на Европската Унија. Во таа насока е договорено продлабочување на економските односи помеѓу македонските и француските компании, како и посета на Македонија од страна на француските компании од регионот на Болен. Овие соработки даваат дополнителен поттик за раст на трговската размена, особено за зголемување на македонскиот извоз“, рече Керим.
„Во делот на производство на вино, во нашата земја од 2005 година започна т.н. револуција во винскиот сектор во земјава, пред сѐ со приватизацијата на дел од винарниците, инвестирањето во нова технологија и отворањето нови модерни винарници. Сепак, целосниот потенцијал сѐ уште не е искористен, бидејќи е потребно да се зголеми извозот на амбалажирано вино, коe се извезува со додадена вредност, што придонесува кон целокупен раст на секторот, зголемување на вредноста како на виното, така и на грозјето како суровина“, наведуваат од ССК.
.webp){kind=icon}
