Вкупните депозити во декември 2022 година бележат месечен и годишен раст од 2,6 и 4,9 проценти, соодветно, во услови на зголемување на депозитите кај домаќинствата и кај компаниите, соопшти Народната банка.
„Овој месец, вкупните кредити остварија раст од 1,4 проценти на месечно ниво, којшто во најголем дел произлегува од зголеменото кредитирање на корпоративниот сектор, при позитивно влијание и на секторот домаќинства. Годишниот раст од 9,4 проценти се должи на повисокото кредитирање на двата сектора, коешто е поизразено кај корпоративниот сектор“, информираат од Народната банка.
Во декември, вкупните депозити на корпоративниот сектор, се зголемија за 3,3 проценти, споредено на месечно ниво.
Најголем придонес кон месечниот раст имаат зголемените краткорочни депозити во странска валута, а во позитивна насока влијаат и депозитните пари, како и останатите компоненти. Во споредба со декември претходната година, депозитите на корпоративниот сектор се повисоки за 3,7 проценти, главно поради зголемените краткорочни депозити во странска валута и во денари, при дополнителен позитивен придонес и на депозитните пари, а во услови на забележан пад на долгорочните депозити во странска валута и во денари.
„Кредитите на корпоративниот сектор во декември, забележаа месечно зголемување од 2,6 проценти, како резултат на растот на кредитите во денари и во странска валута, со поголем придонес на денарските кредити. Годишниот раст изнесува 11,5 проценти и произлегува од повисокото кредитирање во денари и во странска валута, коешто е поизразено кај кредитите во странска валута“, велат од Народната банка.
Во декември, кај депозитите на домаќинствата, е остварен раст од 2,7 проценти на месечна основа.
„Нагорната промена во најголем дел е одраз на зголемените депозитни пари, при дополнителен позитивен придонес и на долгорочните депозити во денари и во странска валута, а во помала мера и на краткорочните депозити во денари. Овој месец, краткорочните депозити во странска валута бележат месечно намалување. На годишно ниво, депозитите на домаќинствата се повисоки за 5,8 проценти во поголем дел како резултат на растот на краткорочните депозити во странска валута и депозитните пари, а во помал дел и на долгорочните депозити во странска валута. Пад на годишна основа е забележан кај краткорочните и долгорочните депозити во денари“, објаснуваат од централната банка.
Кредитите на домаќинствата, во декември, бележат месечен раст од 0,3 проценти којшто во целост се должи на зголеменото кредитирање во странска валута.
„Во споредба со декември минатата година, зголемувањето на кредитите на домаќинствата од 7,3 проценти е резултат на растот на кредитите во денари и во странска валута, со поизразен придонес на кредитите во странска валута“, укажуваат од Народната банка.
Во декември, според намената на кредитите одобрени на физичките лица, најзастапените категории ‒ потрошувачките и станбените кредити, бележат месечен раст од 0,7 и 1,2 проценти, соодветно, при годишен раст од 6,3 и 12,7 проценти, соодветно. Автомобилските кредити се намалија за 0,2 проценти на месечно ниво, додека на годишно ниво се зголемени за 9,1 проценти.
„Кредитите одобрени на кредитни картички, остварија месечен пад од 0,9 проценти, а се зголемени за 0,7 проценти на годишна основа. Овој месец, месечниот пад на негативните салда на тековните сметки изнесува 10,2 проценти, при остварен годишен раст од 1 процент, додека кредитите одобрени врз други основи се намалени за 0,7 и 15,5 проценти на месечно и на годишно ниво, соодветно“, велат од Народната банка.
.webp){kind=icon}
