Околу 67 милиони евра вредат тендерите за изградба, поправка, одржување, надзор и други зафати на македонските патишта за кои од почетокот на годинава досега склучило договори Јавното претпријатие за државни патишта со неколку компании. Убедливо највреден е договорот за обезбедување надзор и правен трансакциски советник за изградба на коридорот 8 и на коридорот 10Д склучен со „ИРД инженеринг“, во износ од 26,3 милиони евра, а на второто место е договорот со „Гранит“ за докомплетирање на изградбата на автопатот Блаце - Скопје, вреден 11,4 милиони евра.
На третото место е договорот склучен со „Ескаватори-МК“ за обнова на државните патишта, во износ од девет милиони евра. Оваа компанија е победник на уште еден тендер на ЈП за државни патишта во 2023 година за поправка и обнова на државните патишта, во вредност од половина милион евра.
За истата намена договор во износ од 7,6 милиони евра е склучен и со „Илинден“ АД Струга. Скопската фирма „Битем“ доби тендер за поставување заштитна звучна ограда на одредени автопатски делници по должина на коридорите 8 и 10 (покрај градот Куманово и покрај населеното место Сарај), вреден 3,4 милиони евра. Друштвото за градежништво и трговија „Жикол“, пак, ќе ја реконструира патната делница Струмица - Дабиле, откако склучи договор со ЈП за државни патишта во износ од околу три милиони евра.
Тетовската фирма „Бион“ ќе инкасира 2,3 милиони евра од договорот со ЈП за државни патишта за поставување сообраќајна сигнализација и опрема на државниот пат А3, делница Буково - Охрид. Друштвото за трговија, сообраќај и услуги „Мирсат комерц“ од селото Челопеци, Кичево, ќе кастри трева и плевел, ќе расчистува грмушки и гранки и ќе собира смет од патиштата во времетраење од две години за 2,3 милиони евра.
Градежниот факултет-Скопје го доби тендерот за консултативни стручни анализи и мислења при проектирање, изградба и одржување на државните патишта во РСМ и за стручни консултации при подготвителни работи за изработка на техничка документација, во износ од 759.000 евра. Друштвото за инженеринг, проектирање и консалтинг „Евроконсалтинг“ ќе врши надзор над реконструкцијата на патната делница Струмица - Дабиле, вреден 95.000 евра.
ЈП за државни патишта од почетокот на годината по распишани тендери склучи два договора со Градежен институт Македонија. Првиот е за надзор над изградбата и докомплетирање на делница од автопатот Блаце - Скопје, во вредност од 228.613 евра, а вториот за надзор над санација на одрон на патот Бошков мост - Мелнички мост, за 57.369 евра.
Иако на тендерите очигледно доминираат домашни компании, македонските градежници подолг период се жалат дека не се доволно ангажирани во изградбата на патната инфраструктура. Според Здружението за градежништво при Стопанската комора на Северна Македонија, дури 96 проценти од договорените работи одат кај странските, а само четири проценти кај домашните компании.
Андреја Серафимовски, претседател на Здружението, во гостување на Блумберг Адрија ТВ најави дека на средба со премиерот Димитар Ковачевски ќе бараат Владата да овозможи да бидат вклучени во реализацијата на коридорите што ќе ги гради „Бехтел и Енка“.
„Во овој момент домашните градежни компании немаат увид во условите од договорот што Владата го потпиша со американско-турскиот конзорциум. Според нашите сознанија, не е стриктно наведено дека македонските компании ќе добијат 51 отсто од работите што ќе ги изведува американско-турскиот конзорциум, туку ќе користи 51 отсто локални ресурси, што не значи дека ќе ангажира компании за изведба, проектирање и ревизија“, вели Серафимовски.
Тој најави дека ќе инсистираат домашните градежници да добијат 51 процент од работите на автопатиштата, и тоа во категориите проектирање, изведба и ревизија.
.webp){kind=icon}
