.webp){kind=icon}
Секое замрзнување на цените има позитивни и негативни последици. Ако Владата смета дека треба да воведе ваква мерка, најубаво е да објасни каква ѝ е идејата и што сака да постигне, рече денеска претседателот на Сојузот на стопански комори (ССК), Трајан Ангелоски.
ССК, како што нагласи Ангелоски, преферира слободен пазар.
Прочитајте повеќе: Ќе замрзнат цените на производите за хигиена, овошјето и зеленчукот
„На 8 септември 1991 година граѓаните на државава гласаа за независност, за слободна економија, за слободен пазар. Слободниот пазар е одлика и придобивка на таа независност и ние генерално преферираме слободен економски пазар, но Владата има свој делокруг на дејствување и доколку така смета, најубаво треба да објасни каква ѝ е идејата, што сака да постигне, дали е тоа од привремен карактер, колку време би траело“, изјави претседателот на Сојузот пред работната средба со главниот извршен директор на Македонската берза, Иван Штериев.
На новинарско прашање како е можно килограм кромид да чини 90 денари, Ангелоски одговори дека причината е веројатно во големата побарувачка за сметка на понудата.
„Имаме добиено десетина барања од европски компании за откуп на кромид од земјава. Дефинитивно постои недостиг од овој производ на европскиот пазар. Претпоставувам дека тоа е причината за вака високата цена. Живееме во реален свет. Ако има поголема побарувачка од понуда, секогаш цените растат“, рече претседателот на ССК.
