.webp){kind=icon}
Владата го продолжи рокот на мерката за ограничени маржи на основните прехранбени производи до крајот на јуни. Од Министерството за економија информираат дека по нивни предлог Владата на денешната седница веќе ја донела одлуката, која ќе остане да се применува до 30 јуни 2023 година.
„Со оваа одлука, највисоката трговска маржа за бел леб (сечен на парчиња или цел), бел шеќер и сончогледово масло за јадење (без ладно цедено масло) се утврдува во висина до пет проценти во трговијата на големо и до пет проценти во трговијата на мало“, пишува во соопштението од Министерството за економија.
Оттаму додаваат дека највисоката трговска маржа за брашно од пченица, тип 400 и тип 500, макарони и шпагети од тврда пченица, македонски бел ориз, трајно кравјо млеко со масленост од 2,8 отсто, 3,2 отсто и 3,5 отсто, јајца од кокошка, урда, кравјо бело сирење и мешано бело сирење, кашкавал, кисело млеко и павлака и јогурт се утврдува во висина до 10 проценти во трговијата на големо и до 10 проценти во трговијата на мало.
„Имајќи предвид дека со оваа одлука се ограничува растот на цените преку утврдување на висината на трговската маржа, која треба да влијае на растот на цените на мало на основните прехранбени производи, а состојбата на пазарот укажува дека цените сè уште не се стабилизирани, се наметна потребата да се предложи измена на одлуката, со која рокот на примената се продолжува за следните два месеца од оваа година, односно од 30 април до 30 јуни 2023 година“, велат од Министерството за економија. Оттаму потсетуваат и дека паралелно се активни и мерките со кои се определуваат највисоки цени во трговијата на мало на свежи јајца од кокошка и ориз (одлука што ќе се применува до 30 април), максимални цени во трговијата на мало на трајно кравјо млеко со масленост од 2,8, 3,2 и 3,5 проценти, урда, кравјо бело сирење и мешано бело сирење, кравји кашкавал, кисело млеко и павлака и јогурт (со примена до 31 мај 2023 година), највисоки цени во трговијата на мало на тестенини (макарони и шпагети), која ќе се применува до 31 мај 2023 година, и максимални цени во трговијата на мало на бел и полубел леб (сечен на парчиња или цел), која ќе се применува до 31 мај 2023 година.
