.webp){kind=icon}
Поранешната зграда на Комерцијална банка ќе добие нов лик за 6,5 милиони евра, а кој ќе се смести таму сè уште не се знае.
Бирото за јавни набавки го објави договорот склучен меѓу Службата за општи и заеднички работи на Владата и друштвото за градежништво,трговија и услуги „Бауер БГ“ ДОО Скопје. Договорот се однесува на реконструкцијата на објектот што порано беше сопственост на Комерцијална банка, а во кој сега се сместени неколку државни институции. Директорот на Службата за општи и заеднички работи на Владата, Петар Мирчевски, вчера не одговараше на телефон за да каже што сè подразбира реконструкцијата на зградата, ниту пак каде ќе се сместат овие институции додека траат работите.
Од Владата кратко одговорија дека нема одлука за тоа кој ќе работи во оваа зграда.
„Објектот што е познат во јавноста како старата зграда на Комерцијална банка-Скопје пред реконструкцијата го користеа неколку државни институции, односно Секретаријатот за европски прашања, МИА и Инспекторатот за животна средина. Во тој контекст сакаме да ве информираме дека по завршувањето на реконструкцијата, Владата на РСМ ќе донесе одлука кои институции ќе ги користат реконструираните простории на објектот“, стои во одговорот од Службата за односи со јавност на Владата.
Во согласност со договорот, вредноста на реконструкцијата изнесува 5,5 милиони евра, а еден милион е данок на додадена вредност. Во рок од пет работни дена „Бауер“ треба да достави банкарска гаранција во висина од 15 отсто од вредноста на договорот. Со тоа ќе гарантира дека навремено, целосно и квалитетно ќе ги изврши работите за кои е ангажиран. Недоставувањето гаранција е основа за раскинување на договорот. Договорот меѓу двете страни е со важност од три години.
Електронската аукција за реконструкција на поранешната зграда на Комерцијална банка, а сега палата АСНОМ, се одржа во декември лани. На неа учествувале четири компании. Освен „Бауер“, понуди доставиле и друштвото за градежништво „Жикол“ од Струмица, „Штрабаг“ и „АК Инвест“ ДООЕЛ од Тетово. Највисоката понуда на акцијата изнесувала 7,8 милиони евра.
Договорот предвидува и казни за извршителот. Во случај да не ги изврши договорените работи, казната изнесува пет отсто од вредноста на договорот, а во случај на ненавремено извршување на работите, еден промил од вкупната договорена цена за секој ден задоцнување.
Блумберг Адрија
Во оваа зграда во септември 2020 година избувна голем пожар, при што беа зафатени просториите на Инспекторатот за животна средина и изгоре голем дел од документацијата.
Владата ја купи зградата во 2012 година по цена од 965 евра за квадратен метар, односно за трите деловни објекти со површина од 22.525 квадратни метри, кои во тој момент беа во сопственост на Комерцијална банка, Владата на тогашниот премиер Груевски плати 21,7 милион евра.
