.webp){kind=icon}
Европарламентарците изгласаа на С. Македонија да ѝ се одобрат 100 милиони евра преку инструментот за макрофинансиска помош. Денеска членовите на Комитетот за меѓународна трговија го поддржаа предлогот на Европската комисија, со што средствата од овој инструмент наскоро ќе бидат ставени на располагање, соопшти владината прес-служба.
Следува потпишување меморандум за разбирање помеѓу С. Македонија и Европската Унија, по што средствата од овој инструмент ќе бидат достапни во две транши.
Макрофинансиската помош е условена со доброто владеење и управување со јавните финансии, односно самиот инструмент е поврзан со имплементацијата на политиките поврзани со управувањето со јавните финансии, даночниот систем, јавно-приватните партнерства, подобрувањето на деловната околина, фискалната транспарентност, транспарентноста во доделувањето државна помош, енергетската ефикасност, реформите во правосудството, како и борбата против корупцијата. Предвид се зема и инструментот за претпазливост и ликвидност што Министерството за финансии минатата година го обезбеди преку ММФ, а кој Фондот го има само со земји со здрави економски фундаменти.
Владата, како што се наведува во соопштението, го поздравува одобрувањето на макрофинансиската помош, како уште еден од многуте примери за партнерството што го имаме со ЕУ и нејзината континуирана поддршка кон нас.
